'მკაცრად გავაკონტროლებთ'- მხარის რწმუნებული ახალციხის ბაზარზე

“მკაცრი კონტროლი გვაქვს ძალიან, დღეს დილიდან იქ არიან მერიის თანამშრომლები. ხალხმრავლობა არ ფიქსირდება და ჩვენ ვფიქრობთ რომ ყოველდღიურ რეჟიმში რიგების მკაცრი კონტროლი იქნება. ამას გააკონტროლებს პოლიციის და მერიის ერთობლივი ჯგუფები, პლუს ბაზრის ადმინისტრაციაც გაფრთხილებულია რომ მათ უნდა უზრუნველყონ დისტანციის დაცვა და მკაცრი კონტროლი რომ ხალხი არ შეიკრიბოს. ეს ყველაფერი ჩვენი მოსახლეობის ინტერესების გათვალისწინებით ხდება, რომ რაღაც სავაჭრო სივრცე დარჩეს,” - ამბობს ამირანაშვილი.

მისი თქმით, ამ ეტაპზე ბაზრის დაკეტვა არ იგეგმება, “მითითება დაკეტვის შესახებ ჯერ არ მიმიღია, როგორ განვითარდება მოვლენები ეს ვირუსის გავრცელებაზეა დამოკიდებული”.

კორონავირუსის პრევენციის მიზნით, 21 მარტიდან ქვეყანაში საგანგებო მდგომარეობა მოქმედებს, ამიტომ 10 ადამიანზე მეტის შეკრება კანონით იკრძალება. მიუხედავად ამისა გუშინ, 29 მარტს, დილიდან ხალხით სავსე იყო ბაზარი. პროდუქტი ძირს, პირდაპირ ქუჩაში ელაგა, მოსახლეობის უმეტესობა კი პირბადის გარეშე გადაადგილდებოდა, რიგები და სიმჭიდროვე იყო ბაზარში მდებარე მაღაზიებშიც.

მოგვიანებით სამართალდამცავებმა მოვაჭრეები ბაზრის ტერიტორიიდან გაიყვანეს, სავაჭრო ცენტრის ხელმძღვანელობა კი 15 000 ლარით დააჯარიმეს.




[მარიამ ბარძიმაძე,ახალციხე]