'ნუ იქმნით ხელთათმანით დაცულობის ყალბ შეგრძნებას' - პაატა იმნაძე

„ჩვენთან დევს ნებისმიერი პროტოკოლი, დაცვის საშუალებების გამოყენების შესახებ, დევს ვიდეოგაკვეთილებიც. მოვუწოდებ ჩემს კოლეგებს, ნახონ ეს ყველაფერი. მესმის, ჩემი კოლეგები შეშფოთებულები არიან, მაგრამ მაინც. ერთ საკითხზე განსაკუთრებით მინდა ყველას ვუთხრა.

ნუ გიჩნდებათ ყალბი შეგრძნება, რომ ხელთათმანით დაცულები ხართ. ხელთათმანი როცა გვიკეთია, ხელს ისევე უნდა დამუშავება სპირტის შემცველი სადეზინფექციო ხსნარით, როგორც ხელებს. რა განსხვავებაა ხელთათმანიან ხელს მოვიკიდებთ სახეზე და ნიღაბს ავიწევ-ჩავიწევთ ან რა განსხვავებაა თუ მობილურს ხელთათმანიანი ხელით ავიღებთ?

კარგად გავითავისოთ ეს რჩევები, ეს ჩემს კოლეგებსაც ეხებათ და სხვებსაც. მაღაზიებში ხშირად ხელთათმანებით მუშაობენ. რა თქმა უნდა, თავს იცავს ეს ადამიანი, მაგრამ გვახსოვდეს, რომ კანიდან არაფერი იჭრება. ხელები რატომაა საფრთხილო? იმიტომ, რომ ხელებით ვეხებით სახეს, ტუჩს, ცხვირს, თვალებს და ასე გადაგვაქვს ვირუსი. ხელთათმანიანი ხელითაც შეიძლება ამის გადატანა, ამიტომ ხშირად უნდა დავიმუშაოთ ხელთათმანიანი ხელებიც“.

პაატა იმნაძემ დღეს ქვეყანაში არსებულ საერთო მდგომარეობაზეც ისაუბრა. მისი თქმით, ჯერჯერობით დაავადებათა კონტროლის ცენტრი საყოველთაო კარანტინის გამოცხადების აუცილებლობას ვერ ხედავს.

27 მარტის 14:00 მონაცემებით, საქართველოში კორონავირუსის 81 დადასტურებული შემთხვევაა, გამოჯანმრთელებულია 13 პაციენტი.

[sknews.ge]