StopCov.ge-ს ეთნიკური უმცირესობის ენები დაემატება

საიტზე უკვე ხელმისაწვდომია აზერბაიჯანულენოვანი ვერსია, რომელიც მთავრობის განმარტებით მომავალი დღეების განმავლობაში უფრო დაიხვეწება.

მთავრობის ადმინისტრაციაში ამბობენ, რომ ამჟამად მუშაობენ სომხურენოვან ვერსიაზე, რომელიც საიტზე ასევე მალე ამოქმედდება.

"მარნეულისა და ბოლნისის მუნიციპალიტეტების მოსახლეობის ინფორმირების მიზნით, კორონავირუსის გავრცელების პირველივე დღეებიდან აქტიურად მუშაობენ ადგილობრივი ხელისუფლების წარმომადგენლები. ყველა მითითება და რეკომენდაცია ითარგმნა. ჩაიწერა ვიდეომიმართვები ქართულ, სომხურ და აზერბაიჯანულ ენებზე, რომელიც გაშუქდა როგორც ადგილობრივი მედიასაშუალების, ასევე სოციალური ქსელების მეშვეობით. რეგიონის მოსახლეობას ეთნიკური უმცირესობების ენებზე დაბეჭდილი საინფორმაციო მასალა სახლებში მიეწოდება", - აღნიშნავენ მთავრობის ადმინისტრაციაში.

ადმინისტრაციის ინფორმაციით პორტალზე უმცირესობის ენებზე განთავსდება საგანგებო რეჟიმის ფარგლებში მიღებული გადაწყვეტილებები, ასევე კორონავირუსთან დაკავშირებული ნებისმიერი სასარგებლო ინფორმაცია. ეს მასალები ასევე განთავსდება საზოგადოებრივი მაუწყებლის ვებგვერდზე www.1tv.ge.

[sknews.ge]