‘არ მჯერა რომ კორონავირუსი მოგონილი არაა’ - როგორ უყურებენ ვირუსის საფრთხეს სამცხე-ჯავახეთის სოფლებში

„ყველა არის ინფორმირებული ვირუსის შესახებ, მაგრამ კორონავირუსმა ჩვენი ცხოვრების რუტინა ვერ შეცვალა. ვცხოვრობთ როგორც ადრე, ყველა დადის სტუმრად სამეზობლოდ, და როგორც ყოველთვის ბავშვები თამაშობენ გარეთ. საზღვარგარეთიდან ჩვენს სოფელში არავინ დაბრუნებულა“, – გვეუბნება ეთნიკური სომხებით დასახლებულ სოფელ წირას მცხოვრები სირან მათევოსიანი.

ახალციხის რამდენიმე სოფელში „სამხრეთის კარიბჭეს“ კითხვაზე, თუ როგორ იცავენ თავს, თქვეს, რომ იციან ახალი კორონავირუსის შესახებ, მაგრამ ფიქრობენ, ვირუსზე ინფორმაცია გამძაფრებულია.

„მე პირადად არ მჯერა, რომ კორონავირუსი მოგონილი არ არის იმისთვის, რომ ხალხი პანიკაში ჩააგდონ და პროდუქტები და წამლები გაასაღონ“, - გვეუბნება ვარუჟან ეზეკიანი.

„სოფელში ძალიან მშვიდი სიტუაციაა, პანიკა არ არსებობს. ყველამ იცის კორონავირუსის შესახებ და იცავს თავს, თავშეყრის ადგილებში ხალხის რაოდენობა შემცირებულია. მეზობლები ერთმანეთთან უკიდურეს შემთხვევებში მიდიან. საზღვარგარეთიდან შემოსული ერთი კაცი თვითიზოლირებულია, მეორე კი ახალციხეში საკარანტინო ზონაშია. გაზაფხულია და ხალხი სოფლის მეურნეობით იტვირთება, თვითოეული თავის ბაღსა და ყანას უვლის“, – ამბობს სოფელ ყულალისის მკვიდრი ავეტის პეტროსიანი.

სოფელ ჭაჭარაქელების თქმით, შეძლებისამებრ ითვალისწინებენ რეკომენდაციებს, მაგრამ ზოგს მათთანაც არ სჯერა, რომ კორონავირუსის საფრთხე ასეთი რეალურია.

ჯავახეთის რამდენიმე სოფელში კი ჰყვებიან, რომ უცხოეთიდან ჩამოსული მოქალაქეები თავისუფლად მოძრაობენ, თვითიზოლაციას წესებს არღვევენ და საფრთხეს უქმნიან სხვა ადამიანებს.

ეთნიკური უმცირესობებით დასახლებულ სოფლებში გაკრულია კორონავირუსის საინფორმაციო პლაკატები სომხურ ენაზე. ახალგაზრდები ამბობენ, რომ კორონავირუსის შესახებ ამბებს უმეტესწილად ინტერნეტიდან იგებენ, ხანდაზმული თაობა კი ინფორმაციას სომხური, რუსული, იშვიათად კი ქართული სატელევიზიო არხებიდან იღებს.

უმცირესობის ენებზე ახალ კორონავირუსთან დაკავშირებით ინფორმაციის გავრცელება დღეიდან, 25 მარტიდან დაიწყო სამთავრობო საინფორმაციო პორტალმა StopCov.ge-მ (http://old.sknews.ge/index.php?newsid=26539). ამ დროისთვის საიტზე მხოლოდ აზერბაიჯანულენოვანი ვერსიაა ხელმისაწვდომი. საქართველოს მთავრობის ადმინისტრაციაში ამბობენ, რომ მიმდინარეობს მუშაობა და უმოკლეს დროში პორტალს სომხურენოვანი ვერსიაც დაემატება.

[რიმა სარუხანიან, სამცხე–ჯავახეთი]