სომხეთში პოლიციამ მედიას სტატიები წააშლევინა, მოქალაქეებს კი ფეისბუკის პოსტები

ინტერნეტ გაზეთი „ჰეთქი“ ჯერ კიდევ გუშინ წერდა „არავოტისა“ და „ჰრაპარაკის“ შესახებ, რომელთა რედაქტორებმაც მანამდე მსგავსი მოთხოვნა მიიღეს.

პოლიციამ ამგვარი მოთხოვნით მიმართა სხვა მედიებსა და მომხმარებლებსაც. გამონაკლისები არც ექიმები აღმოჩნდნენ, რომლებიც სხვა ქვეყნების გამოცდილებაზე დაყრდნობით, მოქალაქეებს სოციალურ ქსელებში პროფესიულ რჩევებს აძლევენ, ხელისუფლების ყურადღების ცენტრში მოექცა პლასტიკური ქირურგის, არტავაზდ სააკიანის ფეისბუკ პოსტი, რომელშიც ის მოქალაქეებს მოუწოდებდა დაიცვან დისციპლინა და ამით დაეხმარონ ექიმებს. ქირურგი ხაზს უსვამდა ევროპაში გაუარესებულ ვითარებას და მკაცრი ზომების გატარების მოთხოვნით მთავრობას მიმართავდა.
„პანიკის გამომწვევი“ პოსტი ქირურგს ფეისბუკ გვერდიდან წააშლევინეს.

„არ მინდა, ჩემმა ჩანაწერმა დიდი აჟიოტაჟი გამოიწვიოს, რადგან ხალხი ისედაც დაძაბულია. ამ ყველაფერს როგორც ექიმი მშვიდად ვუყურებ”, - თქვა „ჰეთქთან“ საუბარში არტავაზდ საკიანმა, თუმცა იქვე დასძინა, რომ ის კვლავაც თავის აზრზე რჩება.

ფეისბუკის საკუთარ გვერდზე გამოაქვეყნა „ევრონიუსის“ მასალა კინორეჟისორმა ტიგრან ხზმალიანმაც. მასალაში საუბარი იყოს იმის შესახებ, თუ როგორ კრძალავენ ღამით კორონავირუსით დაღუპულებს იტალიის ქალაქ ბერგამოში. პოლიციის მოთხოვნით, ამ დროისთვის სოციალური ქსელიდან ეს პოსტიც წაშლილია.

კორონავირუსთან დაკავშირებული ჩანაწერი წააშლევინეს სოციალური ქსელიდან NewArmenia.am-ის ჟურნალისტს, მარინე ხარატიანს. მას ჯერ დაურეკეს, რამდენიმე საათის შემდეგ კი მის სახლში ორი პოლიციელი მივიდა. ”მათ განაცხადეს, რომ ეს ჩანაწერი ქვეყანაში პანიკას იწვევს და კომენდანტის სახელით მოითხოვეს მისი წაშლა, მითხრეს, ვიდრე მოთხოვნას არ შევასრულებდი, არ წავიდოდნენ“, - უთხრა ინტერნეტგამოცემას ჟურნალისტმა.

კორონავირუსის შესახებ მასალების აღება მოთხოვეს გამოცემებს: 168.am, Armday.am, Tert.am და "პასტინფო".

„პასტინფოს“ რედაქტორის, სონა ტრუზიანის თქმით, მიუხედავად იმისა, რომ რედაქცია არ ეთანხმებოდა ამ მიდგომას, სტატია საიტიდან მაინც აიღო.

სტატიაში ეჩმიაძინის მცხოვრები თავის ჯანმრთელობის მდგომარეობაზე საუბრობდა და ჩიოდა, რომ შესაბამისი სამედიცინო შემოწმება არ ჩატარებია.
„ჰეთქის“ კითხვას, თუ რამდენი მედიისგან ან მომხმარებლისგან მოითხოვეს მასალების წაშლა, პოლიციის უფროსის მოადგილემ, აიკ მგრიანმა უპასუხა: „22 სხვადასხვა მედიისა და მომხმარებლისგან მოვითხოვეთ იმ მასალების წაშლა, რომლებიც არ შეესაბამება მთავრობის და კონკრეტულად კომენდანტის მითითებებს და ოფიციალურ შეტყობინებებს“.

მას შემდეგ, რაც სომხეთში საგანგებო რეჟიმი გამოცხადდა პოლიცია, საკომენდანტო ოფისის მოთხოვნით, აგრძელებს ჟურნალისტებისა და სოციალური ქსელების მომხმარებლების გაფრთხილებას, რომ წაშალონ „პანიკის გამომწვევი“ პუბლიკაციები და ჩანაწერები.

[რიმა სარუხანიან, ახალციხე]