‘შორი-შორს დადექით, ეს ყველაფერი თქვენთვის არის’ – პატრიარქი

„დაწყებულია სულიერი განწმენდა ადამიანისა, ჩვენ ვმადლობთ უფალს რომ ასეთი მოთმინებით მივჰყევართ სასუფეველში. უფალი მოწყალეა, უფალი ჩვენთანაა და ჩვენ მასთან ვართ. ჩვენ უნდა ყველაფერი გავაკეთოთ იმისათვის, რომ ჩვენი გზა მივიდეს სასუფეველში“,-თქვა პატრიარქმა.

ილია მეორემ მრევლს უთხრა, რომ ადამიანებს შორის დისტანციის დაცვა, რასაც სპეციალისტები ურჩევენ, ადვილი შესასრულებელია.

„გეუბნებიან, შორი-შორს დადექითო, ეკლესიის გარეთ დადექითო, ეს ყველაფერი თქვენთვის არის. ეს ყველაფერი იოლი შესასრულებელია. მთავარი ის არის რომ ჩვენ არ განვშორდეთ უფალს, უფალთან ვიყოთ. ჩვენ რომ ვამბობთ ჩვენთან არს ღმერთი, ეს არის მთავარი. ჩვენ ვმადლობთ უფალს რომ ღირსი გაგვხადა სასუფეველისა. მე ასევე მინდა შეგახსენოთ, რომ სახლში უნდა გქონდეთ ნაკურთხი წყალი, ყოველდღე უნდა ისხუროთ ნაკურთხი წყალი, თქვენ შვილებს, თქვენ ოჯახს, სახლს, კარ-მიდამოს და ბოროტი სული ვერ მოგეახლებათ თქვენ. თქვენ ბრძანდებით და ჩვენ ვართ რჩეულნი ღვთისანი და ჩვენ ვმადლობთ უფალს. გაიხარეთ", – განაცხადა პარტიარქმა.

სამების საკათედრო ტაძარში წირვის დროს პოლიციაც მივიდა, თუმცა უწყების ინფორმაციით, ადგილზე არანაირ დაღვევას არ დაუფიქსირებიათ.

გუშინ, 21 მარტს ქვეყანაში საგანგებო მდგომარეობა გამოცხადდა,პრემიერ-მინისტრმა გამოსვლისას აღნიშნა, რომ საგანგებო მდგომარეობის ერთ-ერთი პუნქტი ითვალისწინებს და კრძალავს 10 კაცზე მეტი ადამიანის შეკრებას.

„იზღუდება 10 კაცზე მეტი ადამიანის თავშეყრა. მთავრობას ექნება უფლება, კერძო ორგანიზაციების ბიზნესსტრუქტურებს შეუზღუდოს ან დაავალოს კონკრეტული საქმიანობის განხორციელება“.

საგანგებო მდგომარეობის შესახებ პრეზიდენტის მიერ გამოცემულ დეკრეტში ჩანაწერი 10 კაცზე მეტი ადამიანის თავშეყრის შესახებ არ არის. თუმცა, დეკრეტის შესაბამისად მთავრობამ უახლოეს მომავალში უნდა გამოსცეს დადგენილება, სადაც შესაძლოა დაკონკრეტდეს რიგი საკითხები, მათ შორის, შესაძლოა, დაკონკრეტდეს 10 კაცზე მეტი ადამინის შეკრების საკითხიც.

ნახეთ რა წერია პრეზიდენტის მიერ გამოცემულ დეკრეტში.

[sknews.ge]