გიორგი გახარია ვარაუდობს რომ სასწავლო პროცესი 26 აპრილამდე ვერ აღდგება

“უნდა შევთანხმდეთ, როგორ ვალაგებთ პრიორიტეტებს. რა თქმა უნდა, ხელისუფლებისთვის პირველი პრიორიტეტი არის ჩვენი მოქალაქეების ჯანმრთელობა, პირველ რიგში, ბავშვების. აქ გარკვეული ვადები არსებობს. თუ შევძელით, რომ ამ გამოწვევას ვუპასუხოთ შემჭიდროებულ ვადებში, რისიც მეეჭვება… იმ ვადებზე, რა ვადებზეც განათლების სამინისტრო საუბრობს. მაგალითად, დღეის მონაცემებით განათლების სამინისტრო ამბობს, რომ თუ 26 აპრილამდე სკოლებში სასწავლო პროცესი არ განახლდა, უკვე მთლიანად წლის სასწავლო პროცესი დგება კითხვის ნიშნის ქვეშ. იქ გარკვეული სტანდარტები არსებობს. განათლების სამინისტროს მიღებული აქვს დავალება, რომ უახლოეს დღეებში წარმოადგინოს გეგმა. მე ეჭვი მეპარება, რომ 26 აპრილამდე ჩვენ სრულად შევძლებთ სასწავლო პროცესის აღდგენას, თუმცა ამის იმედი რჩება”, – აღნიშნულის შესახებ გიორგი გახარიამ რუსთავი 2-ის ეთერში ისაუბრა.

მისივე თქმით, შესაძლოა, ცალკე აღებული სკოლები უფრო მომზადებული არიან, თუმცა არ უნდა დაგვავიწყდეს, რომ რეგიონებში ბევრი ბავშვია, სადაც ინტერნეტზე წვდომაც კი არ არის.

„ის, რომ დისტანციურად განათლების სისტემა არ არის დღეს მზად, სრულფასოვანი განათლება მისცეს ჩვენს ბავშვებს, ეს ფაქტია და აქ თავი არ უნდა მოვიტყუოთ. შეიძლება ცალკე აღებული სკოლები უფრო მომზადებულები არიან, ვიდრე სხვები, მაგრამ არ უნდა დაგვავიწყდეს, რომ რეგიონებში ძალიან ბევრი ბავშვი გვყავს, სადაც ელემენტარულად ინტერნეტზე წვდომა არის პრობლემა. ამიტომ, ადეკვატურად უნდა შევაფასოთ, სად ვართ და რისი შესაძლებლობები გვაქვს. 26 აპრილამდე ჩვენ თუ შევძელით საგანმანათლებლო პროცესის აღდგენა, მაშინ ერთი სცენარი გვაქვს, და თუ ვერ შევძელით, ეს არის მეორე სცენარი, რომელიც უახლოეს დღეებში განათლების სამინისტრომ უნდა წარმოადგინოს“,-განაცხადა გახარიამ.

კორონავირუსის პრევენციის მიზნით, საქართველოს მთავრობის გადაწყვეტილებით ორი კვირაა დაკეტილია საგანმანათლებლო დაწესებულებები. მუშაობის დისტანციურ რეჟიმდე გადავიდნენ არასამთავრობო და სამთავრობო ორგანიზაციები, ტელეკომპანიები და საინფორმაციო სააგენტოები.

დღეიდან, 18 მარტიდან, უცხო ქვეყნის მოქალაქეებისთვის ჩაიკეტა საქართველოს საზღვრებიც.

ქვეყანაში კორონავირუსით 38 ადამიანია დაინფიცირებული, მათ შორის ოთხი მცირეწლოვანია.

[sknews.ge]