სამარშრუტო ტაქსების მოძრაობა ხვალიდან აიკრძალება

სამარშრუტო ტაქსების აკრაძალვასთან დაკავშირებით მთავრობამ გადაწყვეტილება დღეს, 17 მარტს მიიღო, რის შესახებაც საქართველოს პრემიერ–მინისტრმა გიორგი გახარიამ რამდენიმე წუთის წინ, სპეციალურად გამართულ ბრიფინგზე განაცხადა. მისი თქმით, აკრძალვა მხოლოდ თბილსს არ ეხება, თუმცა არ დაუკონკრეტებია, როგორ მოხდება გადაადგილება იმ ქალაქებში, სადაც ძირითადი ტრანსპორტი სწორედ სამარშრუტო ტაქსებია.

„აიკრძალება სამარშრუტო ტაქსების მოძრაობა, ეს არის საკმაოდ რთული მენეჯმენტი, ეს არის ერთ ერთი ყველაზე მნიშვნელოვანი გავრცელების კერა. ამიტომ ეს გადაწყვეტილება იყო მიღებული და სამარშუტო ტაქსები ხვალიდან აიკრძალება“–განაცხადა გახარიამ ბრიფინგზე.

პრემიერ–მინისტრმა ასევე განაცხადა, რომ ქვეყანა გადადის ვირუსის გავრცელების ეტაპზე.

„დღეს ფაქტიურად გადავდივართ ვისრუსის გავრცელების ეტაპზე, რაც ნიშნავს, რომ რაოდენობა გაგვეზრდება. ეპიდემიის შეჩერების ეტაპიდან გადავდივართ გავრცელების ეტაპზე’, – თქვა გიორგი გახარიამ.

პრემიერ–მინისტრის განცხადებით, ამ ეტაპზე არ არის საჭიროება საგანგებო სიტუაციის გამოცხადების.

რაც შეეხება კორონავირუსს, 17 მარტის დილის მონაცემებით, საქართველოში დადასტურებულია 34 შემთხვევა, საკარანტინო სივრცეებში მოთავსებულია 1008 ადამიანი, ხოლო სტაციონარში მეთვალყურეობის ქვეშ 64 პირია.

[sknews.ge]