ბავრას ტბაში თევზის დახოცვის მიზეზს სპეციალისტები სწავლობენ [ვიდეო]

ახლქალაქში, ბავრას ტბისა და დახოცილი თევზის ნიმუშების შესწავლა სპეციალისტებმა 11 მარტს დაიწყეს. საქმეში ჩართულია სოფლის მეურნეობის სამინისტრო და გარემოსდამცველები: „ნიმუშები აღებულია, როგორც წყლის, ასევე თევზის, უტარდება ექსპერტიზა. პასუხი ორშაბათისთვის იქნება ცნობილი“, - ამბობს სოფლის მეურნეობის სამინისტროს სამცხე-ჯავახეთის რეგიონული სამმართველოს უფროსი ნანა ზუბაშვილი.

ბავრაში იმყოფებოდნენ გარემოსდამცველებიც. ისინი ვარაუდობენ, რომ თევზის მსგავსი მასობრივი დახოცვა ჟანგბადის ნაკლებობამ ან გარკვეულმა დაავადებამ გამოიწვია.

„ზამთარში ტბა გაყინული იყო და როცა ეს აღმოაჩინეს, უკვე დაღუპული იყო ყველაფერი. ზემოთ ტრაქტორი მუშაობდა, რომელმაც გადაკეტა წყლის ჩასასვლელი. სავარაუდოა, რომ ჟანგბადის ნაკლებობამ გამოიწვია“, - ამბობს გარემოსდაცვითი საკითხების ექსპერტი, ნინო ჩხობაძე.

სოფელ ბავრასთან მდებარე წყალსაცავიდან, რომელსაც ადგილობრივები ტბა „ბიოგეკს“ ეძახიან, დიდი რაოდენობით გამორიყული მკვდარი თევზი ადგილობრივებმა 10 მარტს ნახეს. ამ დრომდე გაურკვეველია ზუსტად როდის მოხდა და რამ გამოიწვია მათი დახოცვა.

გთავაზობთ ვიდეოს, რომელსაც ადგილობრივი ავრცელებს.



[რიმა სარუხანიან, ახალქალაქი]