ჯავახეთში ბავრას ტბაში თევზის მასობრივი დახოცვის მიზეზები ცნობილია

ჯავახეთში „კარასის“ იგივე „კარჩხანას“ სახეობის თევზი ახალქალაქის სოფელ ბავრაში, ნინოწმინდის ტბა თორიასა და კიდევ ერთ მცირე წყალსაცავში დაიხოცა.

სამივე შემთხვევა ერთმანეთის მიყოლებით, მარტის დასაწყისში მოხდა. შემთხვევებიდან დაახლოებით სამი თვის შემდეგ, გარემოს დაცვის სამინიტროს პასუხი მხოლოდ ახალქალაქის ბავრას ტბის შემთხვევაზე აქვს.

უწყებამ ლაბორატორიული კვლევისთვის წყლიდან სინჯები აიღო, გარემოს დაცვის ეროვნულმა სააგენტომ კი მათი ქიმიური და მიკრობიოლოგიური კვლევა ჩაატარა.

მათი ინფორმაციით, კვლევამ დაადგინა, რომ ბავრას ტბაში თევზის დახოცვის მიზეზი გარემოსდაცვითი სამართალდარღვევა არ იყო.

„ქიმიური და მიკრობიოლოგიური კვლევის შედეგად არ იქნა გამოვლენილი წყლის იმგვარი დაბინძურება, რასაც შეეძლო გამოეწვია თევზის მასობრივი დახოცვა. არც ლაბორატორიული კვლევით გამოვლინდა თევზის იმგვარი დაავადების არსებობა, რასაც ამგვარი შედეგი მოყვებოდა“, - აცხადებენ გარემოს დაცვის სამინისტროში „სამხრეთის კარიბჭესთან“.

უწყებაში ვარაუდობენ, რომ რადგან დაბინძურებისა და დაავადების რისკები გამოირიცხა, თევზის დახორცვის მიზეზი უჰაერობა იყო: „ამ ფონზე, შესაძლებელია ვივარაუდოთ, რომ თევზის მასობრივი დაღუპვა გამოწვეული იყო უჟანგბადობით, ხოლო ამის გამოწვევი მიზეზი შესაძლებელია ყოფილიყო ისეთ ფაქტორთა ერთობლიობა, როგორიცაა: წყლის ობიექტების მცირე სიღრმე, ჩამდინარე წყლის ნაკლებობა და ტემპერატურული რეჟიმის მკვეთრი ცვლილება“.

თევზის დახოცვის სხვადასხვა მიზეზებზე საუბრობდნენ „სამხრეთის კარიბჭესთან“ იქთიოლოგებიც. მათი ნაწილი უჰაერობას, ნაწილი დაავადების გავრცელებას, ანდა ქიმიურ დაბინძურებას ასახელებდა.

ამ თემაზე შეგიძლიათ ნახოთ - რატომ იხოცება ჯავახეთის ტბებში თევზი - იქთიოლოგების შეფასებები

[თაკო ფეიქრიშვილი, ახალციხე]