საპატრიარქომ აზარტული თამაშების რეკლამის გამო ვებგვერდზე პირდაპირი ეთერი გათიშა

"მოგეხსენებათ, რომ რამდენიმე დღის წინ სატესტო რეჟიმში გაეშვა საპატრიარქოს განახლებული ვებგვერდი, რომლის ახალი ფუნქციაა ე.წ. "ლაივ-სთრიმი" (პირდაპირი ეთერი). აღნიშნული ლაივი (საპატრიარქოს ტელევიზიის) დროებით აღებულია ვიდეოპორტალ "მაივიდეოდან", რის გამოც პირდაპირი ჩართვის დროს გამოჩნდა აზარტული თამაშების რეკლამა. აღნიშნულმა ფაქტმა გაურკვევლობა გამოიწვია საზოგადოების ნაწილში", - განაცხადეს საპატრიარქოს საზოგადოებასთან ურთიერთობის სამსახურში.

მათი განმარტებით, "ვებგვერდი სატესტო რეჟიმშია და შესაბამისი ფინანსური მხარდაჭერის შემთხვევაში აუცილებლად გაკეთდება უშუალოდ საპატრიარქოს გვერდისთვის განკუთვნილი და მორგებული სთრიმი, ამ დროისათვის სწორედ ამ მიზეზით პირდაპირი ეთერი გათიშულია".

საქართველოს მართლმადიდებელი ეკლესიის ვებგვერდზე ერთ-ერთი ტოტალიზატორის რეკლამა გუშინ, ოთხ მარტს გამოჩნდა. პირდაპირი ეთერი myvideo.ge-ს მეშვეობით იყო განთავსებული.

[sknews.ge]