საპატრიარქოს ტელევიზიას ახალი დირექტორი ჰყავს

"ა.წ. 10 მარტიდან ჭყონდიდელი მიტროპოლიტი პეტრე (ცაავა) განთავისუფლდა საპატრიარქოს ტელევიზია „ერთსულოვნების“ დირექტორის თანამდებობიდან. აღნიშნული ტელევიზიის ხელმძღვანელად დაინიშნა ქაშუეთის ტაძრის წინამძღვარი, დეკანოზი მიქაელ ფოფხაძე“, - ნათქვამია საპატრიარქოს ვებ-ვერდზე გავრცელებულ განცხადებაში.

შეგახსენებთ, რომ წმინდა სინოდის გადაწყვეტილებით ჭყონდიდის მიტროპოლიტი პეტრე იმის გამო, რომ უხეშად არღვევდა ეკლესიის მიერ სასულიერო პირთათვის დადგენილ კანონიკურ და ეთიკურ ნორმებს, იგი საპატრიარქოს ტელევიზია „ერთსულოვნების“ დირექტორის თანამდებობიდან გაათავისუფლეს.

"ჭყონდიდელი მიტროპოლიტი პეტრეს განცხადებები მიმართულია ეკლესიის დისკრედიტაციისკენ და წარმოადგენს საქართველოს საპატრიარქოში მოღვაწე რიგ სასულიერო და საერო პირთა მიმართ ცილისწამებას და დაუსაბუთებელ ბრალდებას, რაც დამაბრკოლებელია და შფოთისმომტანი, როგორც საქართველოს მართლმადიდებელი ეკლესიის მრევლში, ასევე ზოგადად ჩვენს ქვეყანაში და უცხოეთში მცხოვრებთა შორის", - აღნიშნული წმინდა სინოდის განჩინებაში წერია, რომლიც საზოგადოებას წმინდა სინოდის სხდომის მდივანმა, სენაკისა და ჩხოროწყუს მიტროპოლიტმა შიო მუჯირმა გააცნო.

საპატრიარქოს ტელევიზიის თანამშრომლებმა 9 მარტს განცხადება გაავრცელეს და საქართველ პატრიარქს მიტროპოლიტი პეტრეს ტელევიზიის დირექტორის თანამდებობაზე დატოვება სთხოვეს, თუმცა უშედეგოდ.

მიტროპოლიტი პეტრე საპატრიარქოს ტელევიზიას 8 წლის განმავლობაში მართავდა.

[sknews.ge]