კორონავირუსთან დაკავშირებით ახალციხეში მიკროავტობუსებს დეზინფექციას ჩაუტარებენ

საზოგადოებრივი ტრანსპორტის დასუფთავების და დეზინფექციის აუცილებლობაზე სამცხე-ჯავახეთის მხარის გუბერნატორმა, საკოორდინაციო საბჭოს შეხვედრაზე გუშინ, სამ მარტს ისაუბრა. სპეციალური ხსნარები კომპანიებმა თავად უნდა შეიძინონ.

ახალციხეში, თამარაშვილის ქუჩაზე მდებარე ავტოსადგურის ხელმძღვანელი, გია გაჩეჩილაძე ამბობს, რომ მიკროავტობუსებს სადეზინფექციო საშუალებებით მიმდინარე კვირაში დაამუშავებენ.

„დამირეკეს ახალციხის მერიიდან და მითხრეს ყველაფერი, გადამამისამართეს თბილისში პიროვნებასთან, ვისაც სადეზინფექციო საშულებები აქვს. როგორც ვიცი 300 აბი 100 ლარი ღირს, არ ვიცი რამდენი დამჭირდება, რადგან დღეში 16 რეისს მაინც ვაკეთებთ. რაც არ უნდა ღირდეს მთავრია ხალხი იყოს კარგად“,- ამბობს შპს „მიზანის“ ხელმძღვანელი გია გაჩეჩილაძე.

ახალციხის ცენტრალურ ავტოსადგურში, ქვეყნის მასშტაბით რეისებს სხვადასხვა კომპანიის მიკროავტობუსები ასრულებენ. შპს „ჯეოტივი“ ერთ–ერთი მათგანია. მისი დირექტორი, ნუგზარ მამუკაშვილი ამბობს, რომ სადეზინფექციო საშულებებს აუცილებლად შეიძენს. ამ კომპანიას ეკუთვნის ქალაქის საზოგადოებრივი ტრანსპორტიც.

„სამხრეთის კარიბჭე“ სამცხე-ჯავახეთის ექვსივე მუნიციპალიტეტში, ადგილობრივ თვითმმართველობებს დაუკავშირდა, გვითხრეს, რომ საზოგადოებრივი ტრანპორტის დეზინფექციის აუცილებლობის შესახებ ყველა კომპანია გააფრთხილეს.



[მარიამ ბარძიმაძე, ახალციხე]