‘სუს–ს ბევრი ინფორმაცია პირადად მივაწოდე’– დეპუტატი ბორჯომის პირველი პირების დაკავებაზე

„მერის და საკრებულოს თავმჯდომარეზე, ძალიან ბევრი ინფორმაცია,საჩივრის სახით, პირადად მაქვს გაგზავნილი სახელმწიფო უსაფრთხოების სამსახურში. ყველაფერი მაქვს აღწერილი, როდის და რა ფართები გასცეს სამეგობროსა და საახლობლოზე. ეს ყველაფერი რა თქმა უნდა უშიშროებამ იცის. ზაფხულიდან მოყოლებული მე ამის რამდენიმე მცდელობა მქონდა“, – განაცხადა „ლეიბორისტული პარტიის“ წარმომადგენელმა გიორგი გიუაშვილმა.

მისი თქმით, მერის და საკრებულოს თავმჯდომარის შემდეგ, სხვა დეპუტების პასუხისმგებლობის საკითხიც უნდა დადგეს.

„დეპუტატები, რომლებიც ამ უკანონობაზე წევდნენ ხელს უნდა იქნენ პასუხისგებაში მიცემული. მსგავსი ერთ–ერთი საკითხი გადიოდა გუშინდელ საკრებულოს სხდომაზე, ააწევინეს ხელი, მიაღებინეს გადაწყვეტილება. ეს საკითხი იყო გადამწყვეტი, დაელოდნენ საკრებულოს სხდომას და შემდეგ დააკავეს მერი და თავმჯომარე“, – ამბობს გიუაშვილი.

რაც შეეხება ბორჯომის საკრებულოში სხვა ოპოზიცური პარტიის დეპუტატებს, ისინი აცხადებენ, რომ მათთვის ეს ინფორმაცია მოულოდნელი იყო.

„ზოგადად კორუფცია და ნეპოტიზიმი უცხო რომ არაა დღევენდელი ხელისუფლებისთვის, ეს ნათელია. წახალისებულია კორუფცია უფრო მაღალ ეშელონებში. უბრალოდ მე ვფიქრობ, რომ ეს არის ხელის შეხოცვა. გაწირეს ხალხის დასანახად, დაბალ რგოლზე გადატეხეს და ხალხს დაანახეს ვითომ კორუფციას ებრძვიან", – განაცხადა "ევროპული საქართველოს" წარმომადგენელმა ბაქარ შირაძე.

„კონკრეტულად რამე საეჭვრო არ დამინახავს. პირიქით, ისე დახატავდნენ, რომ განაშენიანებაა, სკვერი კეთდდება, ის კეთდება, მოგეწონებოდა", – განაცხადა "ნაციონალური მოძრაობის" წარმომადგენელმა ბაკურ გელაშვილმა.

დიდი ოდენობის ქრთამის აღების და უკანობო მშენებლობის მფარველობითვის, სახელმწიფო უსაფრთხოების სამსახურმა ბორჯომის მერი, ლევან ლიპარტია და საკრებულოს თავმჯდომარე, გიორგი გოგიჩაიშვილი გუშინ, 28 თებერვალს დააკავეს. მათთან ერთად, განსაკუთრებით მძიმე დანაშაულის შეუტყობინებლობის ფაქტზე, დაპატიმრებულია ლიპარტიას მეგობარი და ბიზნესმენი გ.უ.

ხელმძღვანელი პირების დაკავებასთან დაკავშირებით კომენტარს არ აკეთებენ ბორჯომის მერიაში, საზოგადოებასთან ურთიერთობის სამსახურში აცხადებენ, რომ მათ მხოლოდ ის ინფორმაცია აქვთ, რაც სუს–მა გავრცელა.

[sknews.ge]