პარლამენტმა ირაკლი შოთაძე გენერალურ პროკურორად 6 წლის ვადით აირჩია

პლენარულ სხდომას არ დაესწრნენ ევროპული საქართველო და ნაციონალური მოძრაობა. რეგისტრაცია 89 დეპუტატმა გაიარა, ირაკლი შოთაძეს 82-მა დეპუტატმა დაუჭირა მხარი, წინააღმდეგი არც ერთი იყო. შვიდმა დეპუტატმა კი თავი შეიკავა.

შოთაძის დაბრუნების გასაპროტესტებლად ოპოზიციის წარმომადგენლები და აქტივისტები პარლამენტთან დილიდან აქციას მართავენ.

ირაკლი შოთაძე გენერალურ პროკურატურას 2015 წლიდან ხელმძღვანელობდა. მან აღნიშნული თანამდებობა 2018 წლის 31 მაისს „ხორავას ქუჩის“ საქმესთან დაკავშირებით, საკუთარი გადაწყვეტილებით დატოვა.

გენერალური პროკურორის თანამდებობა ვაკანტური შალვა თადუმაძის წასვლის შემდეგ გახდა. თადუმაძე უზენაესი სასამართლოს უვადო მოსამართლედ დაინიშნა.

[sknews.ge]