‘ბიძინამ ქართველი ხალხი გადააგდო’,– თბილისში აქციას სამცხე–ჯავახეთიდან უერთდებიან

პროპორციულ სისტემაზე გადასვლის კანონპროექტის ჩაგდების გამო, საქართველოს პარლამენთან მასშტაბური აქცია მიმდინარეობს.

მოძრაობა „სირცხვილიას“ და „შეცვალეს“ წევრებმა საპროტესტო აქციის მთავარი მოთხოვნა დაასახელეს. როგორც შოთა დიღმელაშვილმა თქვა, ისინი ვადამდელ არჩევნებს მოითხოვენ, მანამდე კი ქვეყანას გარდამავალმა მთავრობამ უნდა უხელმძღვანელოს.

აქციაში მონაწილეობის მისაღებად სამცხე–ჯავახეთიდან ოპოზიციური პოლიტიკური პარტიების წარმომადგნელები წავიდნენ.

„პროპორციულ სისტემაზე გადასვლა გამოიწვევდა დემოკრატიის ხარისხის გაუმჯობესებას. ეს ყველაფერი ფეხებზე დაიკიდა ახირებულმა ბიძინა ივანიშვილმა. მივდივარ გასაპროტესტებლად“,–გვითხრა „ევროპული საქართველოს“ ნინოწმინდისა და ახალქალაქის შტაბის ხელმძღვანელმა არსენ კარაპეტიანმა.

მისივე თქმით, ჯავახეთიდან თბილისში გამართულ აქციაზე ბევრი მსურველი წავიდა.

„მე და ჩემი რამდენიმე თანამოაზრე მივდივართ, ვნახოთ რა იქნება თუ საჭირო გახდა მერე უფრო მეტიც წავალთ“,–ამბობს ერთიანი ნაციონალური მოძრაობის ახალქალაქის შტაბის ხელმძღვანელმა აშოტ რაისიანმა.

აქციას მალე შეუერთდებიან „ევროპული საქართველოს“ ახალციხის შტაბის წარმომადგენლებიც.

„სამი მანქანით წავედით ამ ეტაპზე რისი მობილიზაციაც შევძელით. ძალიან შურაცხყოფილად ვიგრძენი თავი. ბიძინამ მთელი საქართველო და ქართველი ხალხი გადააგდო. ის რასაც დაგვპირდა აღმოჩნდა რომ არ ასრულებს. არავინ არ დაიჯერებს იმას რომ რამდენიმე მაჟორიტარმა გაბედა და ბიძინას საწინააღმდეგოდ წავიდა ,ეს არის სრული აბსურდი’,–ამბობს „ევროპული საქართველოს“ ახალციხის შტაბის ხელმძღვანელი გელა დემეტრაძე.

დღეს, 14 ნოემბერს, საქართველოს პარლამენტმა ჩააგდო კანონპროექტი 2020 წლის არჩევნების პროპორციული წესით ჩატარების შესახებ. ინიციატივას 101-მა დეპუტატმა დაუჭირა მხარი, სამი კი წინააღმდეგი იყო.

ინიციატივის პირველი მოსმენით მისაღებად 113 ხმა იყო საჭირო. კენჭისყრამდე რეგისტრაცია 141-მა დეპუტატმა გაიარა. ეს იმას ნიშნავს, რომ 37-მა დეპუტატმა კენჭისყრაში მონაწილეობისაგან თავი შეიკავა.

პროპორციულ საარჩევნო სისტემაზე გადასვლას ახალქალაქი-ნინოწმინდის დეპუტატმა ენზელ მკოიანმა მხარი არ დაუჭირა. ახალციხე-ადიგენის დეპუტატმა გიორგი კოპაძემ კი კენჭისყრაში მონაწილეობა არ მიიღო.

კანონპროექტის ჩაგდების გამო, უმრავლესობა დატოვეს თამარ ჩუგოშვილმა და შვიდმა დეპუტატმა.

[მარიამ ბარძიმაძე, ახალციხე]