სამცხე–ჯავახეთში პიროტექნიკით 9 პირი დაშავდა

პიროტექნიკის არასწორი გამოყენების შედეგად, ახალციხის ორ კლინიკაში, ჯამში რვა დაშავებული შეიყვანეს. კლინიკა „იმედში“ აცხადებენ, რომ შვიდიდან სამი ბავშვი, ოთხი კი ზრდასრული იყო.

„ხელები ჰქონდათ დაზიანებული. ერთს, ოთხი წლის ბავშვს კი თვალის ტრავმა. დაშავებულებს შორის არის დედა–შვილი. ყველა მაგანი საავადმყოფოდან უკვე გავწერეთ“, – აცხადებენ კლინიკაში.

ერთი დაშავებული შეიყვანეს ახალციხის რეფერალურ ჰოსპიტალში, ამბულატორიული მომსახურების შემდეგ, პაციენტი კლინიკიდან მალევე გაეწერა.

ახალი წლის დღეებში ერთი პაციენტი მიიღო ბორჯომის სამედიცინო დაწესებულებამაც. 14 წლამდე ბავშვს ხელის მტევანი ჰქონდა დაზიანებული. ჩაუტარდა ოპერაცია.

ასპინძის, ადიგენის, ახალქალაქის და ნინოწმინდის კლინიკებში დაშავებულები არ შეუყვანიათ.

სასწრაფო სამედიცინო დახმარების ცენტრის ინფორმაციით, 31 დეკემბრისა და პირველი იანვრის მონაცემებით, პიროტექნიკით დაზიანების რეგიონებში 33 შემთხვევა დაფიქსირდა, მათ შორის 16–ის ჰოსპიტალიზაცია გახდა საჭირო.

ჯანდაცვის სამინსიტროს განცხადებით, 31 დეკემბრიდან 2 იანვრის ჩათვლით კვების ინტოქსიკაციის მოტივით საქართველოში 1 254 გამოძახება დაფიქსირდა. 387-კვებითი, 844-ალკოჰოლური, ხოლო 23 ერთდროულად კვებითი და ალკოჰოლური ინტოქსიკაციის გამოვლინებით.

[sknews.ge]