ურაველი, ფოტო:ლაშა გაბელიაერუშეთის ეროვნული პარკი ახალციხეში მთელს ურავლის ხეობას, ასევე სოფელ წყალთბილის მხარეს მოიცავს, ასპინძაში იგი ზველისა და ჭობარეთის მიმდებარედ გრძელდება. ეს არის ის ადგილები, რომლებიც ფლორითა და ფაუნით მდიდარია.
კანონპროექტის მიხედვით, პარკის ტერიტორიის მახლობლად არსებული სოფლები დამხმარე ზონა იქნება და პარკის მოწყობა აქ მცხოვრებლების სოციალურ-ეკონომიკური მდგომარეობის გაუმჯობესებაზე გავლენას მოახდენს.
ეროვნული პარკის მოწყობის ინიციატორი მთავრობაა. კანონპროექტის ავტორი კი ბუნების დაცვის მსოფლიო ფონდი (WWF), რომლის კოორდინირებითაც პარკის სამიზნე ტერიტორიის შესწავლა 2016 წლიდან, გერმანიის მთავრობის დაფინანსებით დაიწყო. ჩატარდა კვლევები ბიომრავალფეროვნების (ფლორა, ფაუნა, ეკოსისტემები) და სოციალურ-კულტურული ასპექტების მიმართულებით.
„მესამე წელია მიმდინარეობს შესწავლა. კანონპროექტი მზად არის, სამინისტროებშია გადაგზავნილი, თუმცა ჯერ პარლამენტს არ განუხილავს და ამას ველოდებით. როდესაც განიხილავს, უკვე შეგვიძლია ჩავთვალოთ, რომ ფორმალურად დაარსებული იქნება“, - ამბობს პროექტის კოორდინატორი, WWF -ს წარმომადგენელი გიორგი ცინცაძე.
მისივე თქმით, ამ ეტაპზე ყველა სამუშაო შესრულებულია. პროექტში ჩართული მხარეები ეტაპობრივად შეხვედრებს მართავენ იმ სოფლებში, რომლებიც ეროვნული პარკის დამხამრე ზონას წარმოადგენენ: „ეროვნულ პარკში არცერთი სოფელი არ აიქნება ჩართული, მაგრამ სოფლები იქნება დამხმარე ზონა. ახალციხიდან დაახლოებით 22-23 სოფელი, ურავლის ხეობა და მისი მოსაზღვრე დასახლებები, თურქეთის საზღვრებთან“.
პროექტში ახალციხიდან ასოციაცია „ტოლერანტია“ ჩართული. მისი ხელმძღვანელი, ცირა მესხიშვილი ამბობს, რომ ეროვნული პარკის მოწყობა მნიშვნელოვანი ნაბიჯი იქნება, არა მხოლოდ ბიომრავალფეროვნების შენარჩუნების თავალსაზრისით, არამედ, მოსახლეობის სოციალურ-ეკონომიკური მდგომარეობის გაუმჯობესებისა და ტურიზმის განვითარების კუთხითაც: „მის მიმდებარე ზონაში, მოსახლეობას აქვს ძალიან ბევრი პერსპექტივა, იმიტომ, რომ შემოვა ბევრი ტურისტი, გაშენდება ვიზიტორთა ცენტრი, ბილიკები, იქნებიან გიდები, რეინჯერები და ა.შ. ყველაფერი, რაც სჭირდება ეროვნულ პარკს. მოსახლეობის სოციალურ-ეკონომიკური გაძლიერებისათვის არის ძალიან მნიშვნელოვანი“.
ერუშეთის ეროვნული პარკი ერთგვარი ტრანსსასაზღვრო ზოლიც იქნება, რადგან დაცული ტერიტორია გრძელდება თურქეთის მხარესაც:
„კონკრეტულად ერუშეთის რაც შეეხება, თურქეთის მხარესაც არის დაცული ტერიტორია, რაც მნიშვნელოვანია, რადგან ერუშეთს სტატუსი აეწევა და საკმაოდ კარგი პერსპექტივა აქვს“, - ამბობს გიორგი ცინცაძე.
როდის განიხილავს პარლამენტი კანონპროექტს, ჯერ ცნობილი არ არის. ერუშეთის პარკის მოწყობის შესახებ პირველად 2019 წლის თებერვალში
გაჟღერდა. მისი ფართობი 11 680, 5 ჰექტარი იქნება.
ამჟამად საქართველოში 88 სხვადასხვა კატეგორიის დაცული ტერიტორიაა: 14 სახელმწიფო ნაკრძალი, 11 ეროვნული პარკი, 42 ბუნების ძეგლი, 19 აღკვეთილი და 2 დაცული ლანდშაფტი. დაცული ტერიტორიების საერთო ფართობი 600 597 ჰექტარია, რაც ქვეყნის ტერიტორიის 8 პროცენტია.
[თაკო ფეიქრიშვილი, ახალციხე]