მართვის მოწმობის გამოცდის ჩაბარება მარტივდება

ამის შესახებ დღეს, 16 ოქტომბერს, შინაგან საქმეთა სამინისტროს მომსახურების სააგენტოს ხელმძღვანელმა ნინო კობახიძემ ისაუბრა. მისი განმარტებით, მოქალაქეებს გამოცდის ჩაბარება მექანიკური გადაცემის კოლოფის მქონე სატრანსპორტო საშუალებაზეც შეეძლებათ და ავტომატურზეც.

თუ მოქალაქე გამოცდას ავტომატურ გადაცემათა კოლოფის მქონე სატრანსპორტო საშუალებაზე ჩააბარებს, მას მხოლოდ ამ სახეობის ტრანსპორტის მართვის საშუალება ექნება. იმ შემთხვევაში, თუ გამოცდას მექანიკურ გადაცემათა კოლოფის მქონე სატრანსპორტო საშუალებაზე ჩააბარებს, მოქალაქეს უფლება ექნება მართოს როგორც ავტომატური, ასევე მექანიკური გადაცემათა კოლოფის მქონე ავტომობილი.

შსს-ს მომსახურების სააგენტოს კიდევ ერთი სიახლის მიხედვით, მართვის აღებისას მძღოლებს საშუალება ექნებათ, მოწმობაზე სისხლის ჯგუფი მიუთითონ.

ნინო კობახიძის განმარტებით, სისხლის ბანკის დახმარებით, მომსახურების სააგენტოს ტერიტორიაზე ლაბორატორია განთავსდება, სადაც უახლოეს მომავალში მსურველებს საშუალება ექნებათ მართვის მოწმობის აღებისას უფასოდ მიიღონ ინფორმაცია საკუთარი სისხლის ჯგუფისა და რეზუსის შესახებ, ხოლო დონორობის შემთხვევაში, მათ ოთხი სახეობის ვირუსზე უფასო გამოკვლევის ჩატარების საშუალება ექნებათ.

გარდა ამისა, 2014 წლიდან შსს-ს მომსახურების სააგენტო, განათლების სამინისტროსთან ერთად, საჯარო სკოლებში საგზაო ნიშნებისა და მოძრაობის უსაფრთხოების წესების სწავლების შემოღებას გეგმავს.

[sknews.ge]