აბასთუმანში ჟღენტების ოჯახს დახმარება სჭირდება

ჟღენტების პრობლემის შესახებ „სამხრეთის კარიბჭემ“ 2018 წლის სექტემბერშიც დაწერა. დალი ჟღენტს ხერხემლის ტვინის სკლეროზი აქვს. მას დიაგნოზი ოთხი წლის წინ თურქეთში დაუსვეს. მას შემდეგ სხეულის ორგანოები ეტაპობრივად გაეთიშა. საწოლში მწოლიარე ცოლს ქმარი უვლის. როინ ჟღენტი ამბობს, რომ მათ სოციალურად დაუცველის სტატუსი არ აქვთ, რადგან კომუნალური გადასახადების ხარჯი მაღალია.

„მძიმე პირობები გვაქვს, მაგრამ მაღალი ქულები მოგვივიდა. გაზის გადასახადი თვეში 100-150 ლარზე ადის და მეზობელი მეხმარება მის გადახდაში. შეშის ღუმელს ვერ ვდგამ, იმიტომ, რომ აქ ყველგან გაზის მილები გადის და არ შეიძლებაო. სხვანაირად ვერ გავთბებით“, - ამბობს როინ ჟღენტი.

მისივე თქმით, ავადმყოფს ყოველდღიურად სჭირდება მედიკამენტები და პამპერსი, რომლის შეძენაც მისთვის რთულია.

„სახლიდან გასვლა და მუშაობა არ შემიძლია, იმიტომ, რომ სულ მიხედვა სჭირდება. სულ გამოცვლა. თვითონ არაფერი შეუძლია. ზოგჯერ მეზობელი მეხმარება, წამლისთვის რომ გავდივარ“.

ჟღენტის მეზობელი სალომე მამუჭაძე ამბობს, რომ ოჯახი რთულ მდგომარეობაშია: „ორი წლის წინ გავიცანი მეც და მაშინ ხელების მოძრაობა შეეძლო დალის, თუმცა საწოლს იყო მიჯაჭვული. ახლა მხოლოდ ტვინი უმუშავებს და თავის მოძრაობა შეუძლია. ვერც მეტყველებს და ვერც ვერაფერი. ნელ-ნელა ეთიშება სხეულის ორგანოები“.

მისივე თქმით, მძიმე პირობების გამო, ოჯახმა 12 წლის შვილი ბათუმის ბავშვთა სახლში გააგზავნა. „ზაფხულობით ჩამოგვყავს ხოლმე, სოციალური მდგომარეობის გათვალისწინებით ასე გადაწყვიტეს“.

ჟღენტების პრობლემის შესახებ სალომე მამუჭაძემ სოციალურ ქსელშიც დაწერა და ინფორმაცია ადიგენის მუნიციპალიტეტის მერიას მიაწოდა.

დღეს, 28 ნოემბერს თვითმმართველობის წარმომადგენლები ოჯახში იმყოფებოდნენ. მერის, ზაქარია ენდელაძის განმარტებით, ერთი წლის განმავლობაში, კომუნალური და მედიკამენტების ხარჯებს მერია დაფარავს: „ერთი წლის განმავლობაში, ელექტოენერგიის, გაზის, მედიკამენტების, მათ შორის პამპერსის ხარჯსა და ასევე რაც დასჭირდებათ, უზრუნველყოფს მერია. ამ ეტაპზე, მივუტანეთ საკვები პროდუქტები. ასევე მერია დაუშვებს შტატს და კეთილმოწყობის სამსახურში დაასაქმებს მეუღლეს, რომ ჰქონდეთ ყოველთვიური შემოსავალი“.

თვითმმართველობის ინფორმაციით, ავადმყოფის მდგომარეობას ექიმები შეისწავლიან: „მივა სამედიცინო პერსონალი და შეისწავლის რა შეიძლება სამედიცინო თვალსაზრისით გაუკეთონ, რადგან ვერ გადაადგილდება, ვერ მიჰყავთ ექიმთან და ჭირდება ძლიერი გამაყუჩებლები“, - განმარტავენ ადიგენის მერიაში.

ჟღენტების დასახმარებლად, ქველმოქმედებისათვის თანხის გადარიცხვა შესაძლებელია ანგარიშის ნომრებზე:

თიბისი
GE68TB7769745064300004
საქართველო
GE79BG0000000125129000

მიმღები სალომე მამუჭაძე

[თაკო ფეიქრიშვილი, ადიგენი]