ანის სკოლის დირექტორისა და პედაგოგის საქმე სააპელაციომ მიიღო

„სასამართლომ მიიღო წარმოებაში, მომივიდა წერილი, სხდომა როდისაა არ ვიცი“, – ამბობს სკოლის დირექტორი მარიამ კაპანაძე.

სააპელაციოდან შეტყობინება ჯერ არ მისვლიათ ანა კეღოშვილსა და მის ადვოკატ, ეკა აბაშიძეს.

„ჯერ არაფერი ჩამბარებია, მხოლოდ ამის შემდეგ გვეცოდინება როდისაა სასამართლო“, – გვითხრა აბაშიძემ.

სოფელ ანის საჯარო სკოლის მასწავლებელს ანა კეღოშვილს, დირექტორის მოთხოვნით, დისციპლინურმა კომიტეტმა საყვედური 24 ივნისს გამოუცხადა.

მას სკოლის დირექცია სამასწავლებლოში ტელეფონით ფარულად ხმის ჩაწერას ედავებოდა. ანა კეღოშვილი კი სასამართლოში, იმ სხდომის ოქმისა და ბრძანების გაუქმებას ითხოვდა, რომლითაც მას საყვედური გამოუცხადეს, პირად საქმეში შეტანით.

ახალციხის რაიონულმა სასამართლომ კეღოშვილის სასარგებლოდ გადაწყვეტილება 20 სექტემბერს გამოიტანა.

მოსამართლე გია ბერაიმ, ანა კეღოშვილის საჩივარი დისციპლინური კომიტეტის სხდომის ოქმისა და ბრძანების გაუქმების შესახებ სრულად დააკმაყოფილა.

[მარიამ ბარძიმაძე, ახალციხე]