საქართველო ევროპის საბჭოს თავმჯდომარე ქვეყანა გახდება

საგარეო საქმეთა სამინისტროს ინფორმაციით, თავმჯდომარეობის გადაცემის ოფიციალური ცერემონია სტრასბურგში, დღეს 27 ნოემბერს გაიმართება.

საქართველო თავმჯდომარეობას საფრანგეთისგან ევროპის საბჭოს მინისტრთა მოადგილეების კომიტეტის სხდომაზე გადაიბარებს.

აღნიშნულთან დაკავშირებით, საქართველოს საგარეო საქმეთა მინისტრი დავით ზალკალიანი სტრასბურგში იმყოფება.

ევროპის საბჭოს თავმჯდომარეობისთვის საქართველოს განსაზღვრული აქვს ოთხი პრიორიტეტი: ადამიანის უფლებები და გარემოს დაცვა; სამოქალაქო ჩართულობა გადაწყვეტილების მიღების პროცესში; ბავშვზე ორიენტირებული მართლმსაჯულება - აღდგენითი მართლმსაჯულების ევროპული გამოცდილება; დემოკრატიის გაძლიერება განათლების, კულტურისა და ახალგაზრდობის ჩართულობით.

„საქართველოს თავმჯდომარეობის ერთ-ერთი პრიორიტეტია ბავშვზე ორიენტირებული მართლმსაჯულება. აღსანიშნავია, რომ საქართველოს მთავრობამ 2015 წელს შეიმუშავა არასრულწლოვანთა მართლმსაჯულების კოდექსი, რომელიც არის მნიშვნელოვანი მიღწევა საქართველოში არასრულწლოვანთა მართლმსაჯულების ასპექტების განვითარებისა და შემდგომი კონსოლიდაციის მხრივ. თავმჯდომარეობის პერიოდში, საქართველო, 2020 წლის 23 მარტს სტრასბურგში ჩაატარებს მრგვალ მაგიდას „ბავშვზე ორიენტირებული მართლმსაჯულება - აღდგენითი მართლმსაჯულების ევროპული გამოცდილება“, რომელიც გამიზნული იქნება ევროპის საბჭოს წევრ სახელმწიფოებზე და მოიცავს ორ მთავარ მიმართულებას - ევროპის საბჭოს სტანდარტების პოპულარიზაცია და საქართველოს მიღწევებისა და გამოცდილების გაზიარება“, – ნათქვამია საგარეო საქმეთა სამინისტროს განცხადებაში.

უწყების ინფორმაციით, აღსანიშნავია, რომ ეს არის პირველი შემთხვევა, როდესაც საქართველო ხდება საერთაშორისო ორგანიზაციის თავმჯდომარე ქვეყანა.

თავმჯდომარეობის ექვსი თვის განმავლობაში საქართველო ევროპის საბჭოს ფარგლებში 20-მდე ღონისძიებას გაუწევს ორგანიზებას.

[sknews.ge]