ასპინძის საძოვრები ნაგავსაყრელიდან ისევ ბინძურდება

ასპინძა-ახალციხის შემოვლითი გზის მიმდებარედ დანაგვიანებულ საძოვრებზე, „სამხრეთის კარიბჭემ“ მასალა მიმდინარე წლის აპრილში მოამზადა, მას შემდეგ შვიდი თვე გავიდა, მაგრამ, ამ ტერიტორიაზე არაფერი შეცვლილა. ნაგავსაყრელიდან ქარის წაღებული ცელოფნები ისევ ყრია საძოვრებზე.

ვეტერინარის შოთა ყულჯანიშვილის თქმით, ხშირია შემთხვევა, როცა პირუტყვი ცელოფანს ან პოლიეთილენის ბოთლებს ჭამს, კუჭი ვერ ამუშავებს და საქონელი კვდება.

„ეს მხოლოდ ასპინძის პრობლემა არ არის, ყველგან სადაც ესეთი ნარჩენებია გაფანტული, ამიტომ პირუტყვის სიკვდილიანობა დიდია. საქონელს ვიტამინები და მინერალები აკლია, ამიტომ ჭამენ ბოთლებს“,- განმარტავს შოთა ყულიჯანიშვილი.

ასპინძის მუნიციპალიტეტის მერიაში ამბობენ, რომ მიმდებარე ტერიტორია თვითმმართველობის მიერ პერიოდულად სუფთავდება, თუმცა ნარჩენები საძოვრებზე მალევე გადადის.

„ამ წელში უკვე რამდენჯერმე გვქონდა დასუფთავების აქცია. ჩვენ „მყარი ნარჩენების მართვის კომპანიასთანაც“ გვქონდა კონტაქტი, ვუთხარით პრობლემის შესახებ, ისინიც ნარჩენებს როგორც კი მიიტანენ ნაგავსაყრელზე, მაშინვე მიწას აყრიან, მაგრამ არ არის იმ სტანდარტის ნაგავსაყრელი რომ ქარმა არ გადმოიტანოს“, - გვითხრეს ასპინძის მუნიციპალიტეტის მერიაში.

ასპინძის ნაგავსაყრელი, „საქართველოს მყარი ნარჩენების მართვის კომპანიას“ დაქვემდებარებაშია, თუმცა რა გეგმები აქვთ, მათ ნაგავსაყრელთან დაკავშირებით, რომ ნარჩენები საძოვრებზე არ გადავიდეს უცნობია, რადგან კომპანიას ვერ დავუკავშირდით.

ასპინძაში, ნაგავსაყრელი დაბიდან დაახლოებით სამ კილომეტრში მდებარეობს.

[ლუბა გიორგაძე, ასპინძა]