‘ჯავახეთის დიასპორა რუსეთში’ რუსეთში საარჩევნო უბნების გახსნას ითხოვს

ამის შესახებ რუსეთში ჯავახეთის დიასპორამ დღეს ოფიციალური განცხადება გაავრცელა.

განცხადების თანახმად, 27 ოქტომბერს დაგეგმილი საქართველოს საპრეზიდენტო არჩევნებისთვის საქართველოს ცენტრალურმა საარჩევნო კომისიამ გამოაქვეყნა ქვეყნების ჩამონათვალი, სადაც საზღვარგარეთ მცხოვრები ქართველებისთვის საარჩევნო პუნქტები გაიხსნა. ამ ჩამონათვალში რუსეთი არ მოხვდა. შესაბამისად, სამცხე-ჯავახეთის მკვიდრები, რუსეთში მცხოვრებ საქართველოს სხვა მოქალაქეებთან ერთად, თავიანთი საკონსტიტუციო უფლების გამოყენებას ვერ შეძლებენ.

განცახდებაში ნათქვამია, რომ ჯავახეთის დიასპორას ამ ფაქტით აღშფოთებული არაერთი მოქალაქე მიმართავს. ვინაიდან, ამ ფაქტის გამო, საქართველოს მოქალაქეების, სამცხე-ჯავახეთის მკვიდრთა 60%-ზე მეტის უფლებები, ვინც რუსეთის ფედერაციის ტერიტორიაზე დროებით ცხოვრობს ან იმყოფება, უხეშად ირღვევა.

„შექმნილ სიტუაციასთან დაკავშირებით, როდესაც მათ საქართველოს საპრეზიდენტო არჩევნებში მონაწილეობის შესაძლებლობა არ ეძლევათ, ჩვენ მკაცრად მოვუწოდებთ საქართველოს მთავრობას:

არჩევნებამდე დარჩენილ პერიოდში გაკეთდეს ყველაფერი, რათა რუსეთის ფედერაციის ტერიტორიაზე მყოფ და მცხოვრებ საქართველოს მოქალაქეებს არჩევნებში მონაწილეობის საშუალება მიეცეთ;

გაუგზავნონ მოთხოვნა რუსეთის მთავრობის შესაბამის უწყებებს რუსეთის ფედერაციის ტერიტორიაზე საარჩევნო უბნების გახსნის ნებართვის მისაღებად;

დაუყოვნებლივ დაიწყოს მოლაპარაკებები რუსულ მხარესთან მომავალ არჩევნებში საქართველოს მოქალაქეთა მონაწილეობის საკითხის მოგვარებისთვის საორგანიზაციო პრობლემების აღმოფხვრისა და „საგზაო რუკის“ შემუშავების თაობაზე;

აუცილებლობის შემთხვევაში შექმნილი პრობლემების მოგვარება უნდა მოხდეს მესამე მხარის დახმარებით“, - ნათქვამია განცხადებაში.

იმ შემთხვევაში თუ საქართველოს ხელისუფლება ამ მოწოდებას არ გაითვალისწინებს, ჯავახეთის დიასპორა რუსეთში საქართველოს საკონსტიტუციო სასამართლოში სარჩელის შეტანას, საქმეში საერთაშორისო ორგანიზაციების ჩართვას და სამცხე-ჯავახეთში საპრეზიდენტო არჩევნების წინასწარ არალეგიტიმურად გამოცხადებას აპირებს.

„საწინააღმდეგო შემთხვევაში ჩვენ წინასწარ ვაცხადებთ, რომ ვიტოვებთ უფლებას:

შევიტანოთ სარჩელი საქართველოს საკონსტიტუციო სასამართლოში საქართველოს მოქალაქის კონსტიტუციით დაცული უფლებების უხეშად დარღვევასთან დაკავშირებით;

მივმართოთ საერთაშორისო ორგანიზაციებს საქართველოს მოქალაქეების საკონსტიტუციო უფლების, მონაწილეობა მიიღოს არჩევნებში, უზრუნველყოფის საქმეში დახმარების თხოვნით;

სამცხე-ჯავახეთის მხარეში საპრეზიდენტო არჩევნები წინასწარ გამოვაცხადოთ არალეგიტიმურად“, - ნათქვამია განცხადებაში.

[sknews.ge]