სამი გოჭი და კეთილი მგელი – თოჯინების თეატრში ახალი სეზონი იწყება

სამი გოჭის ცნობილი ამბავი, რომელსაც თოჯინების თეატრში პრემიერაზე დადგამენ, ახლებური ინტერპრეტაციით იქნება წარმოდგენილი.

„გმირები და ამბავი იგივეა. განსხვავებული ისაა, რომ მგელი კეთილია, სიუჟეტის გადაწყვეტა კი ოდნავ განსხვავებული“, – ამბობს თეტრის სამხატვრო ხელმძღვანელი ვახტანგ ქორიძე.

მისი თქმით, ახალ სეზონზე საბავშვო წარმოდგენების გარდა, დიდებისთვისაც დაიდგმება სპექტაკლები.

„თოჯინების თეატრი არაა მარტო თოჯინების და ბავშვებისთვის. ვცდილობთ, რომ რაც შეიძლება მეტი საინტერესო სიახლე შემოვიტანოთ. ამიტომ გადავწყვიტეთ, ამ სეზონზე თორჯინების თეატრი ზრდასრულ მაყურებელსაც შევთავაზოთ“.

გარდა ამისა, მიმდინარე წელს მაყურებელი კიდევ ორ პრემიერას იხილავს თეატრის სცენაზე, სპექტაკლები ბავშვებისთვის კი ყოველკვირეულად გაიმართება. მიმდინარე წელს, თოჯინების თეატრი წარმოდგენებს შავის ზღვის სანაპიროს ქალაქებშიც გამართავს.

ახალციხის თოჯინების პროფესიული სახელმწიფო თეატრი, კულტურის სამინისტროს დაფინანსების გარდა, ადგილობრივი მერიის ბიუჯეტიდან ყოველწლიურად 20 000 ლარით ფინანსდება. ამჟამად თოჯინების თეატრს შვიდი მსახიობი ჰყავს.



[რობი ზარიძე, ახალციხე]