თოჯინების თეატრი 'სიურპრიზისთვის' ემზადება

სპექტაკლი დავით მაცხონაშვილის რეჟისორობით დაიდგა და მასში ხუთი მსახიობი თამაშობს: "ეს არის თავგადასავლი დიდ თეთრ ბომბორა ძაღლზე, რომელიც საკუთარი შიშების გამო, ამოისვარა ტალახში და ვერავინ ვეღარ ცნობს, ერთხელაც მდინარეში დახრჩობას გადაარჩენს ერთ ბავშვს და წყლიდან რომ გამოვა, ეს ტალახი ჩამოშორდება, მის გმირობაზე უამრავი ამბავი იწერება, თუმცა ძაღლმა ამის შესახებ არაფერი იცის", – ამბობს თოჯინების თეატრის სამხატვრო ხელმძღვანელი ვახტანგ ქორიძე.

"სიურპრიზის" შემდეგ, თეატრში ანდერსენის მიხედვით სპექტაკლი "დროის ქურდები" დაიდგმება, შემდეგ კი "ნაცარქექია". იგეგმება ოპერის დადგმაც.

ოქტომბრის ბოლოს კი პატარა მაყურებელი პრემიერას იხილავს, რომლის პიესის ავტორი და რეჟისორი ვახტანგ ქორიძეა: "სპექტაკლი ეხება ჭორებს, თუ როგორ შეიძლება სხვისმა მოგონილმა ამბებმა, თუ მას ყურს დაუგდებ შენი ფერადი ცხოვრება შავ–თეთრად აქციოს", – გვიყვება რეჟისორი.

მისივე თქმით, სპექტაკლისათვის საჭირო თანხების მოძიება, ერთი წლით ადრე იწყება: "სეზონისთვის 5 000 ლარამდე თანხაა გამოყოფილი. ყველა სპექტაკლისათვის კეთდება ახალი თოჯინები. კანონმდებლობა მოითხოვს, რომ ერთი სპექტაკლის რეკვიზიტი მეორე სპექტაკლში არ გამოიყენო, ასევე თანხა გვჭირდება მუსიკისთვისაც, რომელსაც კომპოზიტორები სპექტაკლისთვის ქმნიან", – განმარტავს ქორიძე.

ამჟამად, თოჯინების თეატრს შვიდი შტატიანი მსახიობი ჰყავს, თუმცა განახლებულ სეზონზე კიდევ ერთი მსახიობის დამატება იგეგმება.
სპექტაკლები, ტრადიციულად, ყოველ კვირას, 13:00 საათზე იმართება. დასწრების ღირებულება კი 3 ლარია.

[ავთანდილ ინასარიძე, ახალციხე]