ახალციხეში საარჩევნო სისტემის ცვლილების საყოველთაო-სახალხო განხილვა მიმდინარეობს

საყოველთაო-სახალხო განხილვებში მონაწილეობენ საპარლამენტო და არასაპარლამენტო პოლიტიკური პარტიების და არასამთავრობო ორგანიზაციების წარმომადგენლები, კონსტიტუციონალისტები და ექსპერტები.

დღევანელი შეხვედრა სამცხე–ჯავახეთის სახელმწიფო უნივერსიტეტის სააქტო დარბაზში იმართება. განხილვებზე თავისუფალი დასწრების საშუალება აქვს ნებისმიერ დაინტერესებულ პირს.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემით ჩატარებას ითვალისწინებს.

ცვლილებები 2020 წლის პროპორციული წესით ჩატარებას გულისხმობს, ამასთან, ნულპროცენტიანი (ბუნებრივი) ბარიერით. პარლამენტის მანდატის მიღება შეუძლია ყველა პარტიას, რომელიც, ხმების სულ მცირე 0,67%-ს დააგროვებს.

პარტიებს აკერძალებათ ბლოკებად გაერთიანება, ხოლო გაუნაწილებელ მანდატებს ის პარტიები მიიღებენ, რომლებსაც ყველაზე ნაკლები ხმა სჭირდებათ მომდევნო მანდატის მისაღებად.

საყოველთაო-სახალხო განხილვები 13 სექტემბერს დაიწყო და 30 სექტემბერს დასრულდება. სულ, ქვეყნის მასშტაბით 11 საჯარო შეხვედრა გაიმართება.

პარლამენტთან მიმდინარე აქციის მონაწილეების ერთ-ერთი მთავარი მოთხოვნა სწორედ პროპორციული სისტემით 2020 წლის საპარლამენტო არჩევნების ჩატარება იყო.

[sknews.ge]