ტურისტები ახალციხის ციხეზე მიუსაფარ ძაღლებთან ერთად [ფოტო/ვიდეო]

მიუსაფარი ძაღლები როგორც ქვედა, ისე ზედა ციხის ტერიტორიაზე შეგხვდებათ. ტურისტების ნაწილი ძაღლებთან ერთად ციხის დათვალიერების წინააღმდეგი არაა, ნაწილი კი ფიქრობს, რომ ეს საკითხი ციხის ადმინისტრაციამ უნდა მოაგვაროს და ტერიტორიაზე ძაღლების შემოშვება უნდა აკრძალოს.

გია ოქრომლიძე ახალციხის ციხეს ქალაქ რუსთავიდან ესტუმრა. მან ოჯახთან ერთად ციხის ორივე ნაწილი და მხარეთმცოდნეობის მუზეუმი დაათვალიერა. როგორც თავად ამბობს, ზედა ციხეზე შესვლის დროს ძაღლები იქამდე დაჰყვებოდნენ, ვიდრე მუზეუმში არ შევიდნენ.

„ბავშვებს ეშინოდათ და ხელში აყვანილები დაგვყავდა. მეჩეთშიც კი შემოგვყვნენ“, – ამბობს გია ოქრომელიძე.

ციხის ტერიტორიაზე მიუსაფარი ძაღლების პრობლემაზე, დამთვალიერებელი ლონდა ალანიაც ამახვილებს ყურადღებას: „მე არ უნდა მჭირდებოდეს ძაღლების მოგერიება იქ, სადაც ყოველდღურად უამრავი ტურისტი დადის. ვინმეს, რომ უკბინოს პასუხისმგებლობას ვინ აიღებს?! ზოგს ყურზე ნიშანი უკეთია ზოგს კი არა“.



რაბათს, ტურისტულ სეზონზე და არამხოლოდ მაშინ, ყოველდღიურად რამდენიმე ათეული ტურისტი სტუმრობს. ციხის ადმინისტრაციის განმარტებით მათ არ აქვთ უფლება ძაღლები დაიჭირონ და ტერიტორიიდან გაიყვანონ, „დაყვირებით და შეშინებით კი ტერიტორიას არ ტოვებენ“.

„ჩვენ სპეციალური ძაღლის დასაჭრიც კი მოვატანინეთ, მაგრამ მერე გვითხრეს, რომ ძაღლების დაჭერა კანონის დარღვევა იქნებოდა, იმიტომ, რომ მუნიციპალიტეტში ძაღლების თავშესაფარი ამ ეტაპზე არაა“, – ამბობს ახალციხის ციხის დირექტორი დავით ტაბატაძე.

ტაბატაძე ციხის ტერიტორიაზე ძაღლების მომრავლებას ტურისტების ცხოველებისადმი თბილ დამოკიდებულებასაც უკავშირებს.

„ქალაქში ძაღლებს აჭმევენ, მერე ისინი ციხის ტერიტორიაზეც მოჰყვებიან და აქ რჩებიან. გვქონდა ერთი შემთხვევა, როცა ჩვენმა თანამშრომელმა, ძაღლის ჯოხით მოგერიება სცადა ციხის ტერიტორიაზე შემოსვლის დროს, მაგრამ ტურისტების მხრიდან ამას მოჰყვა ძალიან დიდი აგრესია, პოლიციაშიც კი დარეკეს“, – გვიყვება ტაბატაძე.









[თორნიკე ზაზაძე, ნანა ინასარიძე, ახალციხე]