ახალქალაქში ქალაქის დაარსებიდან 955 წლისთავს აღნიშნავენ [ფოტო]

ახალქალაქის ცენტრალურ პარკში გამოფენილია ადგილობრივი რეწვის ოსტატების ნამუშევრები, ასევე, მოწყობილია ამ კუთხისთვის დამახასიათებელი ტრადიციული სამზარეულო, სადაც სტუმრებს კერძების დაგემოვნება შეუძლიათ. დღესასწაულისთვის სამი სახის ტოლმას, ქადას ღაფამას და პარისას დაამზადებენ. ასევე შესაძლებელია ლუდის, თაფლის, ყველის და ტკბილეულის დაგემოვნებაც.

სამუსიკო სკოლის მიმდებარე ტერიტორიაზე ძველი მანქანებია გამოფენილი.

12:30 საათიდან სპორტული შეჯიბრებები დაიწყება, ჭიდაობაში, კარატესა და ჭადრაკში. 14:45 საათზე კი ადგილობრივი ანსამბლების კონცერტი გაიმართება. პატარებს ოჩოფეხებზე შემდგარი ჯამბაზები გაამხიარულებენ.

მოწვეული სტუმრები ასევე გაეცნობიან პურის ცხობის უძველეს ტრადიციას. შემდეგ იქნება ფერების ფესტივალი და ველორბოლა.

ქალაქის დღესასწაული საღამოს დისკოთეკით დასრულდება.

ახალქალაქის მერის იური უნანიანის განმარტებით, ასე მასშტაბურად ახალქალაქის დღე მეორედ აღინიშნება.









[რობი ზარიძე, ახალქალაქი]