სახელმწიფო ენის ნორმების დარღვევისთვის შესაძლოა სანქციები დაწესდეს

კანონპროექტი პარლამენტში ოფიციალურად რეგისტრირებული არ არის. საკითხის ინიცირებას, რომელიც მეცნიერებათა აკადემიასთან ერთად მომზადდა, განათლების საპარლამენტო კომიტეტმა დღეს, 26 სექტემბერს, მხარი დაუჭირა, თუმცა ეს მხოლოდ პროექტის სამუშაო ვარიანტია.

კანონპროექტის განმარტებით ბარათში ნათქვამია, რომ მისი მიღების მიზანი საქართველოს ტერიტორიაზე ქართული ენის სახელმწიფო სტატუსის განმტკიცება და სახელმწიფოებრივი და საზოგადოებრივი ცხოვრების ყველა სფეროში მათ გამოყენებაზე, დაცვაზე, განვითარებაზე, შესწავლასა და პოპულარიზაციაზე განუხრელად ზრუნვაა. საქართველოს მოქალაქე ვალდებული ხდება ფლობდეს სახელმწიფო ენას. ამავე დროს, კანონპროექტი ითვალისწინებს სახელმწიფო ენის ცოდნის კანონმდებლობით დადგენილ მოთხოვნებთან პირის შესაბამისობის შეფასებას, რაც სახელმწიფო ენის გამოცდის ჩაბარებას გულისხმობს. ამ ვალდებულებისგან მხოლოდ ის პირები გათავისუფლდებიან, ვისაც საშუალო, ან უმაღლესი განათლება სახელმწიფო ენაზე აქვთ მიღებული.

კანონპროექტის ერთ-ერთი მუხლი მასობრივი ინფორმაციის საშუალებათა ენას ეხება. ქართული სალიტერატურო ენის ნორმების დარღვევისათვის მასობრივი ინფორმაციის საშუალებებისთვის ჯარიმა პირველ ჯერზე 1 000-დან 5 000 ლარამდე, ხოლო განმეორების შემთხვევაში 10 000 ლარამდე იზრდება.

ცვლილება საჯარო მოხელეებსაც შეეხება. კერძოდ, თანამდებობის პირის მიერ სახელმწიფო ენის არცოდნის მოტივით განცხადების ან წერილობითი დოკუმენტის მიღებაზე უარის თქმა, გამოიწვევს დაჯარიმებას 200 ლარიდან 500 ლარამდე თანხის ოდენობით. ხოლო იგივე ქმედების განმეორებით ჩადენის შემთხვევაში ჯარიმა 500 ლარიდან 1 500 ლარამდე გაიზრდება.

[Sknews.ge]