პოლონეთის საერთაშორისო დახმარების ფონდმა სახანძრო სამსახურებს აპარატურა გადასცა

ჰიდრავლიკური მაკრატლები თავისი ტუმბოებით დღეს, 25 სექტემბერს ადიგენის, ასპინძის ახალციხის და ჩოხატაურის მუნიციპალიტეტების სახანძრო-სამაშველო სამსახურების ხელმძღვანელებს ფონდის ვიცე- პრეზიდენტმა კრიშტოფ ივინსკიმ გადასცა. საჩუქრების გადაცემის ცერემონიალს ადგილობრივი თვითმმართველობის წარმომადგენლებიც დაესწრნენ.

„პოლონეთის საერთაშორისო დახმარების ცენტრი უკვე რამდენიმე წელია ახორციელებს საქართველოში პროექტებს. ეს არის კრიზისების მართვის პროექტი. გასულ წელის იყო სამედიცინო დახმარების პროგრამა, როდესაც სამედიცინო ცენტრებს გადავეცით სამედიცინო აღჭურვილობა. ახლა კი ოთხი კომპლექტი გადავეცით ჰიდრავლიკული მაკრატლებისა თავისი ტუმბოებით. სავარაუდოდო პროექტებს ისევ გავაგრძელებთ, ოღონდ შესაძლოა მიმართული იყოს წყალდიდობების წინააღმდეგ ბრძოლისკენ“,- ამბობს ფონდის ვიცე- პრეზიდენტი კრიშტოფ ივინსკი.

ახალ აპარატურასთან მუშაობის შესასწავლად სახანძრო-სამაშველო სამსახურის წარმომადგენლებს ტრენინგები უკვე სამი დღეა უტადებათ. მათ მოწვეული სტუმრების წინაშე ჰიდრავლიკური მაკრატელი პრაქტიკაში გამოიყენეს და მსუბუქ ავტომანქანაზე ივარჯიშეს.

სახანძრო-სამაშველო სამსახურის წარმომადგენლებს ტრენინგები ხვალ დაუმთავრდებათ.

„ერთი ჰიდავლიკური მაკრატელი ჩვენც გადმოგვეცა, ტრენინგებზე გაგვიზიარეს პოლონელმა კოლეგებმა საკუთარი გამოცდილება და გვასწავლეს მაკრატლის გამოყენებაც“, - ამბობს ასპინძის სახანძრო-სამაშველო სამსახურის უფროსი ზურაბ ცინცაძე.



[თინათინ ზაზაძე, ახალციხე]