38 სამედიცინო დაწესებულებაში ადმინისტრაციული სამართალდარღვევის ოქმი დაიწერა

სამედიცინო საქმიანობის რეგულირების სააგენტომ სამედიცინო დაწესებულებებში მიმდინარე კომპლექსური მონიტორინგის პირველადი შედეგები წარადგინა.

სააგენტოს ცნობით, რეგულირების სააგენტომ უკვე შეამოწმა 95 კლინიკა, რომელტაგან 38-ში უკანონო საექიმო საქმიანობისა და შეტყობინების გარეშე სამედიცინო საქმიანობის შესახებ შესაბამისი ოქმები დაიწერა.

უწყებაში აცხადებენ, რომ მთელი ქვეყნის მასშტაბით, ეტაპობრივად, წინასწარი გაფრთხილების გარეშე მონიტორინგი ჩატარდება ქვეყანაში რეგისტრირებულ ყველა სამედიცინო დაწესებულებაში.

თითოეულ კლინიკაში გადამოწმდება ინფრასტრუქტურასთან, აღჭურვილობასთან, სამედიცინო პერსონალთან, ინფექციური კონტროლის ღონისძიებებთან, ხარისხის შიდა სისტემის ფუნქციონირებასთან, ასევე, სამედიცინო სერვისების მიწოდებასთან დაკავშირებული ის სპეციფიკური პირობები, რაც არის სამედიცინო მომსახურების ხარისხისა და უსაფრთხოების საფუძველი.

სამედიცინო საქმიანობის რეგულირების სააგენტოს ცნობით, მონიტორინგის შედეგების მიხედვით, გატარდება ქმედითი ღონისძიებები ქვეყანაში სამედიცინო მომსახურების შემდგომი გაუმჯობესებისთვის.

[sknews.ge]