ბაკურიანში შემოვლითი გზის სამ კილომეტრზე მშენებლობა დასრულდა

მუნიციპალური განვითარების ფონდის ინფორმაციით, ბაკურიანის შემოვლითი გზის პროექტირება-მშენებლობა გრძელდება. პროექტი ევროპის საინვესტიციო ბანკის დაფინანსებით ხორციელდება. ამ ეტაპზე, პროექტის ფარგლებში სამკილომეტრიანი გზის მშენებლობა დასრულდა და ხელოვნური ნაგებობების მოწყობა მიმდინარეობს.

„შემოვლითი გზის არარსებობის გამო, ბაკურიანში ხშირი იყო საცობები, რაც ტურისტების და ადგილობრივი მოსახლეობის კომფორტულ და უსაფრთხო გადაადგილებას ხელს უშლიდა. სამუშაოების დასრულების შემდეგ კი ეს პრობლემა სრულად მოგვარდება“, - ნათქვამია მუნიციპალური განვითარების ფონდის მიერ გავრცელებულ ინფორმაციაში.

მათივე თქმით, შემოვლითი გზის მშენებლობის გარდა, ბაკურიანში სხვა ძვირადღირებული პროექტებიც ხორციელდება. მათ შორისაა, მიტარბისა და კოხტას საბაგირომდე მისასვლელი გზის რეაბილიტაცია და დიდველზე პარკინგის გაფართოება.

ასევე დაგეგმილია ბაკურიანისთვის სპეციალური ტრანსპორტის შეძენა, ბაკურიანის ურბანული განახლება, სატრანსპორტო გეგმის შემუშავება და ბაკურიანის რეკრეაციული პარკის რეაბილიტაცია.

დაბა ბაკურიანში განსახორციელებელ ინფრასტრუქტურულ პროექტებისთვის ჯამში 55 მილიონი ლარი იხარჯება.

ბაკურიანის შემოვლითი გზის პროექტი, ევროპის საინვესტიციო ბანკის (EIB) დაფინანსებით, კომპანია გ&კ ტექნოლოგი 6 354 211 ლარად ახორციელებს.

[sknews.ge]