აბასთუმნის შემოვლითი გზის მშენებლობა ახალი პროექტით

როგორც საავტომობილო გზების დეპარტამენტში განმარტავენ, ბაღდათი–აბასთუმნის გზის მონაკვეთის სამუშაოები დაყოფილია შვიდ ლოტად.

„სამ ლოტზე უკვე დაწყებულია სამშენებლო სამუშაოები, ერთზე რამდენიმე დღეში დაიწყება, ხოლო დანარჩენ სამ ლოტზე ტენდერია გამოცხადებული საპროექტო სამუშაოებისათვის“, – აცხადებენ საავტომობილო გზების დეპარტამენტის პრესსამსახურში.

სატენდერო დოკუმენტაციის მიხედვით, შემოვლითი გზის მშენებლობის მიზანი ის არის, რომ საკურორტო ზონის ფარგლებში ტრანსპორტმა არ იმოძრაოს და ეკოლოგიური გარემო მაქსიმალურად იყოს დაცული.

აბასთუმანში შემოვლითი გზის მშენებლობა, გასულ წელს, მას შემდეგ გადაწყდა, რაც პარტია „ქართული ოცნების“ თავმჯდომარე ბიძინა ივანიშვილი აბასთუმანში ორი კვირით ისვენებდა.

ივანიშვილმა განაცხადა, რომ აბასთუმანში „ექსპერიმენტის“ ჩატარებას აპირებდა და ელექტრომობილები უნდა შეეყვანა, ამიტომ აქ სხვა ტრანსპორტი ვერ იმოძრავებდა.

ვიდრე ივანიშვილი ამ გადაწყვეტილებას მიიღებდა, ბაღდათი–აბასთუმნის გზის სამშენებლო სამუშაოების პროექტი შეჩერდა. აღნიშნული პროექტით გზის 60 კილომეტრიანი მონაკვეთის მოასფალტება მოხდებოდა და ამისთვის 60 მილიონი დოლარი უნდა დახარჯულიყო. ამ პროექტით სამუშაოები 2020 წელს დასრულდებოდა.

პროექტის შეცვლის შემდეგ, რა თანხა დაიხარჯება და როდის დასრულდება გზის მშენებლობა უცნობია.

ვიდრე, აბასთუმნის შემოვლით გზაზე სამშენებლო და საპროექტო სამუშაოები მიმდინარეობს, მუნიციპალური განვითარების ფონდმა კურორტზე ავტოპარკინგის მშენებლობისათვის ტენდერი გამოაცხადა, რომელიც, სხვა სატრანსპორტო საშუალებებთან ერთად, ელექტრომობილების განლაგებასაც ითვალისწინებს.

[ლუბა გიორგაძე, ადიგენი]