ბაკურიანის შემოვლითი გზა გაიხსნა [ფოტო]

პროექტის ფარგლებში, სამ კილომეტრზე მოეწყო გზის სავალი ნაწილი ბეტონის საფარით, წყალგამტარი მილები, სადრენაჟე სისტემები, მიერთებები, გვერდულები და საფეხმავლო ბილიკები.

ახალი სამკილომეტრიანი გზა, დაბა ბაკურიანის შესასვლელში იწყება და დასახლების ცენტრალურ ნაწილს აღარ კვეთს. გზა დაბის ტყიან რელიეფზე გადის და სოფლების ანდეზიტისა და ციხისჯვრის გადასახვევთან მთავრდება.

გზის მშენებლობის სამუშაოები 2018 წლის ივნისში დაიწყო და 2019 წლის სექტემბერში დასრულდა.

„მუნიციპალური განვითარების ფონდი“ ბაკურაინში კიდევ რვა ინფრასტრუქტურულ პროექტს ახორციელებს, რომელთა ჯამური ღირებულება 55 მილიონი ლარია.

ამ პროექტების ფარგლებში, ბაკურიანში აშენდება მრავალსართულიანი ავტოსადგომი, მიტარბისა და კოხტას საბაგირომდე მისასვლელი გზა და გაფართოვდება ავტოსადგომი დიდველზე, შენდება პოლიციის ახალი ორსართულიანი შენობა, მიმდინარეობს ბაკურიანის ცენტრალური ბილიკისა და გზის მოწყობის სამუშაოები, ბაკურიანის ურბანული განახლების პროექტი და ბაკურიანის რეკრეაციულ პარკში ტურისტული ინფრასტრუქტურის განვითარების პროექტი.

ასევე, ფონდს დაგეგმილი აქვს ბაკურიანისთვის 30-მდე სხვადასხვა სახის სპეციალური ტექნიკის შეძენაც.













[თაკო ფეიქრიშვილი, ბორჯომი]