არალში დასაცლელი ურნების შესახებ ჩივიან [ფოტო]

არალსა და წარბასთუმანში მცხოვრებლები ამბობენ, რომ უკვე მეორე კვირაა ნაგვის მანქანა მათთან არ მიდის. შესაბამისად, ურნები ნაგვით სავსეა და გარემოს აბინძურებს.

„ადრე მოწესრიგებული იყო, ხშირად იცლებოდა. ბოლო პერიოდში აღარ მოდის ნაგვის მანქანა. სად წავიღოთ ეს ნაგავი არ ვიცით. გვერდით ბავშვები თამაშობენ, სუნი და ანტისანიტარიაა. ცენტრალურ გზაზე ყოველ მესამე დღეს იცლება, მაგრამ ამ გზაზე ბოლოს აღარ მოსულა“, - ამბობენ ადგილობრივები.

მათივე თქმით, ნაგვის გადასახადს რეგულარულად მუნიციპალიტეტის მიერ დაწესებული ტარიფის მიხედვით იხდიან - ოჯახის თითოეულ წევრზე ერთ თვეში ერთ ლარს.

ადიგენის სოფლებში ნაგვის გატანაზე პასუხისმგებელი მუნიციპალიტეტის დაქვემდებარებაში არსებული ააიპ-ია. „ადიგენის დასუფთავების სამსახურში“ ირწმუნებიან, რომ ურნები არალი-წარბასთუმნის გზაზე სამი დღის წინ დაიცალა და აქ ნაგვის მანქანა გეგმის მიხედვით დადის: „ნამდვილად იყვნენ ასულები სამი დღის წინ, შეიძლება ამ სამ დღეში გაივსო, ახლა გრაფიკით უწევთ ასვლა და დღეს აუცილებლად დაიცლება ურნები“, - აცხადებენ ადიგენის მერიაში.





[თაკო ფეიქრიშვილი, ადიგენი]