ახალქალაქში აბრებზე შეცდომით დატანილი დასახელებები ისევ არ შეუცვლიათ

საავტომობილო გზების დეპარტამენტში განმარტავენ, რომ ახალი აბრები იყო დასამზადებელი, რის გამოც ივლისში მათი შეცვლა ვერ მოხერხდა.

„კომპანიას უკვე შეკვეთილი აქვს აბრები, სადაც სწორედ იქნება დატანილი დასახელებები და მალე დაიწყება შეცვლის პროცესი. ვფიქრობთ, რომ ივლისის ბოლომდე დავასრულებთ“, – განმარტავენ საავტომობილო გზების დეპარტამენტში.

უწყებაში მბობენ, რომ ახალქლაქის გარდა, აბრები რეგიონის ყველა იმ ტერიტორიაზე შეიცვლება, რომელიც დეპარტამენტის ბალანსზეა და დასახელებები არასწორად არის დაწერილი.

ახალქალაქის მუნიციპალიტეტში, ათობით სოფლის აბრაზე, დასახელებები შეცდომითაა დატანილი. აღნიშნულის შესახებ პირველად, სოციალურ ქსელში, პუბლიცისტმა კუკური მეტრეველმა დაწერა.

სამცხე–ჯავახეთის სამხარეო ადმინისტრაციამ ენის პალატას დასახელებების შესასწავლად მიმართა, რის შემდეგაც, ენის პალატისაგან მიღებული ინფორმაციის მიხედვით, ადმინისტრაციამ დასახელებები დააკორექტირა და, ახალი აბრების განსათავსებლად, შესაბამისი დოკუმენტი საგზაო დეპარტამენტს გადაუგზავნა.

[ლუბა გიორგაძე, ახალქალაქი]