ახალქალაქში აბრებზე შეცდომით დაწერილი დასახელებები ივლისიდან შეიცვლება

„შეცდომით დატანილი დასახელებები ზუსტად რამდენი აბრაა ვერ გეტყვით, თუმცა ჩვენს ბალანზსე არსებული ყველა აბრა იქნა შესწავლილი და დაზუსტებული და ივლისის დასაწყისიდან უკვე შეცვლას დავიწყებთ“, – განმარტავენ საავტომობილო გზების დეპარტამენტში.

გარდა ახალქალაქისა, საავტომობილო გზების დეპარტამენტში „სამხრეთის კარიბჭეს“ განუცხადეს, რომ რეგიონის მასშტაბით წარწერები ყველა იმ, აბრაზე შეიცვლება, სადაც შეცდომით წერია და რომელიც დეპარტამენტის ბალანსზეა.


როგორც მხარის რწმუნებულის მოადგილე შალვა ბერძენიშვილი განმარტავს, აბრებზე არსებული წარწერები, ენის პალატისაგან მიღებული ინფორმაციის მიხედვით, დააკორექტირეს და ახალი აბრების განსათავსებლად, საგზაო დეპარტამენტს გადაუგზავნეს. ენის პალატას, ახალქალაქსა და რეგიონის მასშტაბით, აბრებზე დატანილი დასახელებების შესასწავლად სამცხე–ჯავახეთის სამხარეო ადმინისტრაციამ მიმართა.

ახალქალაქის მუნიციპალიტეტში, ათობით სოფლის აბრაზე, დასახელებები შეცდომით წერია. აღნიშნულის შესახებ პირველად სოციალურ ქსელში პუბლიცისტმა კუკური მეტრეველმა დაწერა.

[ლუბა გიორგაძე, ახალქალაქი]