'წვიმის წყალმა გამოუთხარა ძირი' - მდინარეზე გადაწოლილი ტირიფი

მდინარეზე გადაწოლილი ტირიფის ხე, ქალაქის ცენტრალურ ნაწილში შემოსასვლელი ხიდიდან ნათლად ჩანს. ადგილობრივები ამბობენ, რომ ხე ერთი თვის წინ გადაყირავდა, მისი წყლიდან ამოღება კი არავის უცდია.

გიორგი ზაზაძე, რომელიც დიდიმამიშვილის N2ა–ში მაღაზიას აკეთებს, ამბობს, რომ ნაპირზე არსებულ ხეს, წვიმების დროს, ქუჩიდან ჩამოსულმა ნიაღვარმა მიწა გამოაცალა და წაიქცა.

მისივე თქმით, წვიმების დროს, დიდიმამიშვილის ქუჩებიდან წამოსული ნიაღვარი, მდინარის ნაპირისკენ პატარა ჩასასვლელით მიედინება.

„აქ პატარა ჩასახვევია, რომლითაც მდინარის ნაპირზე ჩადიხარ, წყალემა კი სულ გააფუჭა. ეს წყალი ალბათ, შენობასაც გამოუთხრის ძირს“, – ამბობს ზაზაძე.

„სამხრეთის კარიბჭემ“ წაქცეული ხის შესახებ მერიის „კეთილმოწყობის“ სამსახურს აცნობა, სადაც განაცხადეს, რომ ხეს წყლიდან ამოიღებენ.

„ეს არაა არც დანაგვიანება, არც რაიმე საფრთხის შემცველი, თუმცა, ჩვენ ამოვიღებთ მაგ ხეს. სავარაუდოდ, ამწე დაგვჭირდება. ხეს სოციალურად დაუცველებს მივცემთ“, – ამბობს შპს „კეთილმოწყობის“ სამსახურის უფროსი კობა კურტანიძე.

[მარიამ ბარძიმაძე, ახალციხე]