'რთული არ იყო' - პირველი სესიიდან გამოსული აბიტურიენტები

„გამოცდაზე ხარვეზი არ ყოფილა, რთული თემები არ იყო, არ გამჭირვებია, თითქმის ყველაფერი დავწერე და დარწმუნებული ვარ, ჩავაბარებ“, - გვითხრა გამოცდიდან გამოსულმა თემურ ბოჭორიშვილმა, რომელიც ახალციხის უნივერსიტეტში აპირებს სწავლას.

საბა კურტანიძე, გამოცდის დასრულეაბამდე ერთი საათით ადრე გამოვიდა: „ჩასაბარებლად ბორჯომიდან ჩამოვედი, ჩემთვის რთული არ იყო, ჯავახიშვილში ინგლისურ ფილოლოგიაზე ვაპირებ ჩაბარებას“.

„ცხოვრების ახალ ეტაპზე გადადიხარ და დიდი პასუხისმგებლობაა, თუმცა ჩემს თავში დარწმუნებული ვარ. გამოცდისთვის 2 საათი დამჭირდა, ყველა საკითხი დავწერე და ვფიქრობ, თავი კარგად გავართვი“, - გვითხრა პირველი სკოლის ყოფილმა მოსწავლემ ნიკოლოზ მინაძემ.

ახალციხის საგამოცდო ცენტრის ადმინისტრატორს გელა ინასარიძეს ვკითხეთ, ხომ არ დაფიქსირდა რაიმე ტიპის დარღვევა: „პირველმა სესიამ პრობლემებისა და ექსცესების გარეშე ჩაიარა“.

გამოცდაზე რეგისტრაცია 8:00 საათზე დაიწყო. რეგისტრირებული 270 აბიტურიენტიდან 258 გამოცხადდა. გამოცდის ხანგრძლივობა 4 საათი და 15 წუთია.

როგორც ახალციხის საგამოცდო ცენტრის უფროსმა გელა ინასარიძემ გვითხრა, საგამოცდო პროცესი მშვიდ ვითარებაში მიმდინარეობს: „ერთ აბიტურიენტს საგამოცდო ბარათი სახლში დარჩა, თუმცა ბაზა გვაქვს, ამოვუბეჭდეთ და შევიდა გამოცდაზე“.

გამოცდის მეორე სესიაზე რეგისტრაცია 14:00 საათზე დაიწყება.

[ავთო ინასარიძე, ახალციხე]