აბასთუმანში ობსერვატორიის რეაბილიტაცია ხუთი თვის დაგვიანებით დასრულდება

ობსერვატორიის მთავარი შენობის რეაბილიტაცია, გასული წლის ივნისში დაიწყო. როგორც, „სამხრეთის კარიბჭეს“ მუნიციპალური განვითრების ფონდში განუმარტეს, სამშენებლო კომპანიებმა სარეაბილიტაციო სამუშაოების განახლება, წელს ცივი კლიმატური პირობების გამო, მარტის ნაცვლად მაისიდან შეძლეს.

„გარდა ამისა, ობსერვატორიის ადმინისტრაციამ გვთხოვა პროექტში გარკვეული ცვლილებები შეგვეტანა, ამის გამო 20 ნოემბრისთვის დასრულდება სამუშაოები“, – განმარტავენ მუნიციპალური განვითარების ფონდში.

ამ დროისათვის, აბასთუმნის ობსერვატორიის მთავარი შენობის რეაბილიტაცია მიმდინარეობას. როგორც დაწესებულების დირექტორი მაია თოდუა აცხადებს, სამუშაოებს ვიზიტორების მიღებაზე ხელი არ შეუშლია: „გვაქვს კიდევ ერთი ტელესკოპი და ჩვეულებრივად ვაგრძელებთ მუშაობას, გვყავს ექსკურსიებიც“.

ობსერვატორიის რეაბილიტაციას მსოფლიო ბანკი 3 მლნ–მდე ლარით აფინანსებს. პროექტი ითვალისწინებს, დიდი ტელესკოპის AZT-11-ის შენობის სრულ რეაბილიტაციას, სადაც განთავსდება ვიზიტორთა საინფორმაციო ცენტრი, კაფე, მოეწყობა საგამოფენო და სამუშაო სივრცე და აღდგება არსებული ბიბლიოთეკა.

პროექტის ფარგლებში, ასევე, გათვალისწინებულია მთავარი საპროექტო შენობის მიმდებარედ, დასახლების ცენტრალური ტერიტორიის კეთილმოწყობა, 1982 წელს აშენებული საბაგირო გზის აღდგენა, საპირფარეშოებისა და პარკინგის მოწყობა. გ

სამუშაოებს ტენდერში გამარჯვებული შპს "ABEKA" და შპს "პალადა" ახორციელებენ.

აბასთუმანში ობსერვატორია 1932 წელს აკადემიკოსმა ევგენი ხარაძემ დააარსა და ის პირველი სამთო ასტროფიზიკური დაწესებულებაა ყოფილ საბჭოთა კავშირში. მას წელიწადში, დაახლოებით, 10 ათასი ტურისტი სტუმრობს.

ნახეთ მასალა,როგორი იქნება აბასთუმნის ობსერვატორია რეაბილიტაციის შემდეგ.



[ლუბა გიორგაძე, ადიგენი]