ადვოკატი:'ვანო მერაბიშვილის მიმართ დარღვეულია სამართლიანი სასამართლოს პრინციპი'

ადვოკატების განცხადებით, ქუთაისის სააპელაციო სასამართლოს თავმჯდომარე მალხაზ გურული, რომელმაც ძალაში დატოვა მერაბიშვილის აღკვეთის ღონისძიება, სისხლის სამართლის საქმეთა პალატის წევრია. საქართველოს კანონმდებლობის თანახმად, კი აღკვეთის ღონისძიების განხილვის უფლება მხოლოდ საგამოძიებო კოლეგიის წევრ მოსამართლეს აქვს.

"აქედან გამომდინარე მას არ ჰქონდა უფლება, განეხილა აღკვეთის ღონისძიება, შესაბამისად მოსამართლე მალხაზ გურულმა დაარღვია კანონი", - ნათქვამია განცხადებაში, რომელიც დღეს, 5 სექტემბერს, დილით, ვანო მერაბიშვილის ფეისბუქის გვერდზე გამოქვეყნდა. განცხადებას თან ერთვის დოკუმენტებიც.

ადვოკატების თქმით, ვანო მერაბიშვილის მიმართ დარღვეულია სამართლიანი სასამართლოს პრინციპი, რასაც დაცვის მხარე, სხვა დარღვევებთან ერთად, სტრასბურგის სასამართლოში გაასაჩივრებს. ადვოკატებს იმედი აქვთ, რომ ამ სარჩელს აუცილებლად მოიგებენ. ამიტომ, მათი განცხადებით, "თუ საქართველოს მთავრობას სურს თავიდან აირიდოს საერთაშორისო სკანდალი, უახლოეს დღეებში უნდა მიმართოს სასამართლოს და მოითხოვოს მერაბიშვილის მიმართ აღკვეთის ღონისძიების გაუქმება".

დაცვის მხარე ასევე მიმართავს საქართველოს იუსტიციის უმაღლეს საბჭოს,შეისწავლოს აღნიშნული ფაქტი და დაიწყოს მის მიმართ დისციპლინური დევნა.

"დაცვის მხარე ასევე მოითხოვს აცილება მიეცეს ყველა იმ სასამართლოს, რომლის განაჩენიც აპელაციის შემთხვევაში უნდა გასაჩივრდეს ქუთაისის სააპელაციო სასამართლოში, ვინაიდან ამ სააპელაციო სასამართლოს თავმჯდომარეს უკვე გამოტანილი აქვს უკანონო გადაწყვეტილება და არსებობს ეჭვი, რომ იგი არის პროკურატურის კონტროლის ქვეშ. კითხვებს ბადებს ისიც, რომ ივანე მერაბიშვილთან დაკავშირებული ყველა შუამდგომლობა, მათ შორის, აღკვეთის ღონისძიება, ყადაღის დადება და შემდეგ მოხსნა, პროკურატურის შუამდგომლობით წინასასამართლო სხდომების ვადის გაგრძელება, ადვოკატის შუამდგომლობით ვადის გაგრძელებაზე უარი, განხილა ერთმა მოსამართლემ დავით ახალბედაშვილმა, რაც ეწინააღმდეგება დამკვიდრებულ სასამართლო პრაქტიკას.

ზემოაღნიშნული ფაქტებიდან გამომდინარე, ვფიქრობთ აშკრაა, რატომ ითხოვს პროკურატა დაჟინებით საქმის განხილვას ქუთაისში, მაშინ როდესაც პროკურატურისავე მტკიცებით, ერთი დანაშაული ჩადენილია თბილისში, ხოლო მეორე ბათუმში. საქმის ქუთაისში განხილვა ასევე ეწინააღმდეგება დამკვიდრებულ სასამართლო პრაქტიკას და ასევე მეტყველებს სუბიექტურ მიდგომაზე", - ნათქვამია განცხადებაში.

დაცვის მხარე ვანო მერაბიშვილის ჯანმრთელობის მდგომარეობის საკითხსაც ეხმაურება.

"დაცვის თხოვნაზე, მიეცათ ოჯახისათვის ექიმების შეყვანისა და მერაბიშვილის ჯანმრთელობის მდგომარეობის შემოწმების უფლება, სასჯელაღსრულების სამინისტრომ განაცხადა, რომ მერაბიშვილთან სისტემატურად შედის ფსიქიატრი. სამინისტროს აგდებული დამოკიდებულება დაკავებულის ჯანმთელობის მიმართ დაცვის მხარეს აიძულებს მიმართოს საერთაშორისო საზოგადოებას და უფლებადამცველ ორგანიზაციებს განსაკუთრებულ კონტროლზე აიყვანონ მერაბიშვილის ჯანმრთელობასთან დაკავშირებული პრობლემები", - აცხადებენ ადვოკატები.

[sknews.ge]