რევაზ რევაზიშვილი: ადიგენის პოლიციის თანამშრომლებს უფლებამოსილება შეწყვეტილი უნდა ჰქონდეთ

ადიგენის მუნიციპალიტეტის სოფელ კიკიბოს მკვიდრი, ყოფილი პატიმარი რომან იაკობაძე ადიგენის რაიონული სამმართველოს თანამშრომლებს ადანაშაულებს, რომ მას აიძულებდნენ ნათესავისთვის იარაღი ჩაედო.

საქმეს სამცხე-ჯავახეთის საოლქო პროკურატურა იძიებდა, თუმცა იაკობაძემ სამცხე-ჯავახეთის მთავარ პროკურატურას საქმის გამოძიებაზე აცილება მისცა.

სამცხე-ჯავახეთის ოლქის პროკურორის გიორგი პაპუაშვილის განცხადებით, ადიგენის რაიონული სამმართველოს თანამშრომლების საქმე შინაგან საქმეთა სამინისტროს გენერალურ ინსპექციას გადაეცა: „მათ დაქვემდებარებაშია და სამინისტრო იძიებს მომხდარს“.

რომან იაკობაძის ადვოკატის, საიას იურისიტის, რევაზ რევაზიშვილის თქმით, მისი დაცვის ქვეშ მყოფი მომხდარის შესახებ შინაგან საქმეთა სამინისტროში უკვე დაიკითხა: „ის გამოიკითხა საქმის დეტალებზე. სასამართლო პროცესი როდის გაიმართება არ ვიცით, ამაზე საუბარიც არ არის ჯერ-ჯერობით, შესაძლოა ეს იყოს ორი თვის ან ერთი წლის შემდეგ. ეს დამოკიდებულია იმაზე, დამნაშავე პირებს რამდენად მალე დაადგენს გამოძიება“.

ადვოკატი მიიჩნევს, რომ პოლიციელებს რომელთა საქმესაც გენერალური ინსპექცია იძიებს სამსახურეობრივი უფლებამოსილება შეწყვეტილი უნდა ჰქონდეთ, თუმცა ეს ასე არ არის: „რა თქმა უნდა, ეს იწვევს ჩვენს გულისწყრომას, თუმცა, ჩემი დაცვის ქვეშ მყოფის ინტერესებს არ ლახავს“.

როგორც „სამხრეთის კარიბჭესთან“ შინაგან საქმეთა სამინისტროს პრესსამსახურის წარმომადგენლმა ნინო ცხადაძემ განაცხადა, გენერალური ინსპექცია ადიგენის რაიონული სამმართველოს თანამშრომლების მიმართ საქმეს სისხლის სამართლის კოდექსის 333-ე მუხლის პირველი ნაწილით იძიებს: „რაც სამსახურეობრივი უფლებამოსილების გადამეტებას გულისხმობს“.

[თამუნა უჩიძე, ახალციხე]