ახალქალაქის ბაზრის კონტროლიორი დააკავეს

ფინანსთა სამინისტროს საგამოძიებო სამსახურის თანამშრომლებმა მ.ო. ახალქალაქის ბაზარში დღეს, 16 მაისს აიყვანეს. საქმის მასალების მიხედვით, მან ბაზარში მოქალაქეს პირადი გამორჩენის მიზნით ფართი მიაქირავა, რაშიც 1 000 ლარი აიღო, თუმცა ეს ოფიციალურად არ გააფორმა, ანუ მოქალქესთან შესაბამისი ხელშეკრულება არ დადო.

როგორც სამცხე–ჯავახეთის საოლქო პროკურატურაში აცხადებენ, მას ბრალი სისხლის სამართლის კოდექსის 221–ე მუხლის მეორე ნაწილის ა ქვეპუნქტით ედება. რაც ჯგუფურად კომერციულ მოსყიდვას გულისხმობს.

ახალქალაქის მერიის შპს „ახალქალაქის აგრარული ბაზარი“ 2014 წელს ჩამოყალიბდა. მ.ო. კი აქ უფროსი კონტროლიორის პოზიცია 2017 წლის ოქტომბრიდან უკავია.

„რა მოხდა დეტალები არ ვიცი. ფინანსთა სამინისტროს საგამოძიებო სამსახურმა წერილობით მოითხოვა ამ შპს–ს კუთვნილი ყველა დოკუმენტი და გადავეცით“, – ამბობს ახალქალაქის მერი იური უნანიანი.

მ.ო–ს ჯერ ბრალი არ წარდგენია, შესაბამისად უცნობია ცნობს თუ არა თავს დამნაშავედ.

[თამუნა უჩიძე, ახალქალაქი]