სოციალური მუშაკები ახალციხში, ხვალიდან, 25 მარტიდან სამსახურში არ გამოცხადდებიან

25 მარტიდან მთელი ქვეყნის მასშტაბით სოციალური მუშაკების გაფიცვა იწყება. სოციალური მომსახურების სააგენტოში დასაქმებული სოციალური მუშაკები უმძიმესი სამუშაო პირობების გაუმჯობესებასა და ბენეფიციარებისათვის ეფექტიანი და მყისიერი მომსახურებების შექმნას ითხოვენ.

„ჩვენ ხელი გვაქვს მოწერილი გაფიცვაზე, შესაძალოა თბილისში ვერ წავიდეთ, თუმცა, სამსახურში არ გამოვცხადდებით“, – ამბობენ სამცხე–ჯავახეთის სოციალური მომსახურების სააგენტოს სოციალური მუშაკები.

დღეს, 24 მარტს, არასამთავრობო ორგანიზაციების ნაწილმა განცხადება გაავრცელა, სადაც წერია, რომ სოციალურ მუშაკებზე სხვადასხვა მუნიციპალიტეტში ზეწოლა ხორციელდება იმისთვის, რომ ისინი ხვალ 25 მარტს, დაანონსებულ გაფიცვას არ შეუერთდნენ.

სამცხე–ჯავახეთის სოციალური მომსახურების სააგენტოში დასამქებული სოციალური მუშაკები აცხადებენ, რომ მათ მიმართ მსგავს ფაქტს ადგილი არ ჰქონია.

სამცხე–ჯავახეთის ექვს მუნიციპალიტეტში რვა სოციალური მუშაკი და ერთი უფროსი სოციალური მუშაკია. მათ შორის ახალციხესა და ასპინძაში – ორ–ორი, ბორჯომში, ნინოწმინდაში, ახალქალაქსა და ადიგენში კი ერთ–ერთი სოციალური მუშაკია. მათ მუშაობა მძიმე პირობებში უხდებათ.

შეგახსენებთ, რომ სოციაულრმა მუშაკებმა კოლექტიური დავა სოციალური მომსახურების სააგენტოს წინააღმდეგ 2019 წლის რვა თებერვალს დაიწყეს. თვენახევრიანი მედიაციის პროცესი უშედეგოდ დასრულდა.

[sknews.ge]