აშშ-ის ელჩის მოადგილე ბაკურიანში სამთო კურსის მიმდინარეობას გაეცნო

ელიზაბეთ რუდი, სასწავლო უბანზე, ქართველი ინსტრუქტორების დახმარებით, ამერიკელ სამხედროებთან ერთად უშუალოდ ჩაერთო სამთო წვრთნაში.

ამერიკელი სამხედროები, ნატოს წევრი და პარტნიორი ქვეყნებიდან მოვლენილ ჯარისკაცებთან ერთად, ნატოს "პარტნიორობა მშვიდობისათვის" პროგრამის (PFP) ფარგლებში, სამთო მომზადებას ქართველი ინსტრუქტორების დახმარებით ბაკურიანში უკვე სამი კვირაა გადიან.

ამერიკელი სამხედროები თხილამურებზე სრიალს, ზვავში მოყოლილი ადამიანის ძებნისა და ევაკუაციის ტექნიკურ მეთოდებს, ასევე თხილამურებით დაბრკოლებათა ზოლის გადალახვას და თოვლის თავშესაფრის მოწყობას ეუფლებიან.

კურსის განმავლობაში ისინი ტაქტიკურ მარშებსაც ახორციელებენ.

ამერიკელ დიპლომატს თავდაცვის სფეროში თანამშრომლობის ოფისის (ODC) წარმომადგენელთან, მაიორ თომას ჰატფილდთან ერთად პოლკოვნიკ ბესიკ ქუთათელაძის სახელობის საჩხერის სამთო მომზადების სკოლის მეთაურმა, ვიცე-პოლკოვნიკმა მალხაზ გოლეთიანმა უმასპინძლა და სამთო კურსის მიზნებისა და ამოცანების შესახებ პრეზენტაცია წარუდგინა.

[sknews.ge]