'სჯობდა ტატუნაშვილის სახელი რქმეოდა' – ვალეში ცენტრალური ქუჩა სტალინის სახელობისაა [Video]

50 წლის ჯიმშერ დემეტრაძე ვალეში, სტალინის N10 - ში ცხოვრობს და ამბობს, რომ მისთვის სტალინის სახელობის ქუჩაზე ცხოვრება საამაყოა: „ვიცი რა გაუკეთებია, მისი წარსულიც ვიცი, თუმცა ჩვენთვის სტალინი მაინც დიდებული კაცია“.

ჯიმშერის აზრს იზიარებენ მის მეზობლად მცხოვრებლებიც.

„სტალინის ქუჩა უნდა გვქონდეს. ამით გახარებული ვარ“, – ამბობს ოთარ ჩიტაშვილი.

„ამ ქუჩაზე სახლები ინგრევა და მთავარია ეს მოაწესრიგონ, ქუჩა კი თუნდაც ჟუკოვის სახელობის იყოს, ამას მნიშვნელობა არ აქვს“, – აცხადებს გელა ხითარიშვილი.

ვალეში მცხოვრები ხათუნა ხითარიშვილი ქუჩის სახელწოდებაში პრობლემას ვერ ხედავს, თუმცა ურჩევნია ქუჩა გმირების სახელს ატარებდეს: „ჯობდა თანამედროვე გმირების სახელი რქმეოდა, მაგალითად, არჩილ ტატუნაშვილის“.

განსხვავებულად ფიქრობენ უმცროსი თაობის წარმომადგენლები: „საქართველოს წარსულზე სტალინის გავლენის გამო, ჩემთვის მიუღებელია ქუჩის ეს სახელწოდება, თუმცა პოსტსაბჭოთა სივრცეში ბევრი ადამიანი დარჩა, ვისთვისაც ფაშიზმი და სტალინიზმი მიმზიდველია“.




საქართველოს კანონის, „თავისუფლების ქარტიის“ პირველი მუხლის თანახმად, აღნიშნული ქუჩის სახელწოდება უნდა აღმოიფხვრას: „ამ კანონის მიზანია ... კომუნისტური ტოტალიტარული და ფაშისტური იდეოლოგიების საფუძვლების გაღვივების წინააღმდეგ პრევენციული ღონისძიებების განხორციელება, კომუნისტური ტოტალიტარული და ფაშისტური სიმბოლიკის, საკულტო ნაგებობების, ძეგლების, მონუმენტების, ბარელიეფების, წარწერების, ქუჩების, მოედნების, სოფლებისა და დაბების სახელწოდებების აღმოფხვრა.“

აღნიშნული კანონი 2011 წლიდან მოქმედებს. შეკითხვაზე, იგეგმება თუ არა ქუჩის სახელწოდების შეცვლა და ამ საკითხის კანონმდებლობის ფარლგებში მოქცევა, ახალციხის მერის მოადგილემ გურამ მელიქიძემ გვიპასუხა: „წერილობით მოგვმართეთ და გიპასუხებთ".

ვალეში მცხოვრებლები აცხადებენ, რომ სტალინის ქუჩისთვის სახელის გადარქმევის საკითხი დღის წესრიგში არცერთი ადგილობრივი თივთმმართვეობის დროს არ დამდგარა.



1921 წლის 25 თებერვალს, რუსეთის წითელმა არმიამ თბილისი აიღო და საქართველოს საყოველთაო და თავისუფალი არჩევნების გზით არჩეული ხელისუფლება დაამხო, რის შედეგადაც განახორციელა საერთაშორისო სამართლის სუბიექტის – საქართველოს დემოკრატიული რესპუბლიკის – ანექსია.

[ავთო ინასარიძე, ახალციხე]