ახალციხის ციხეზე კედლის ნაწილი სველდება და მისი დაზიანების საფრთხე იქმნება

ახალციხის ციხის ისტორიული კომპლექსში, კედლის ის ნაწილი, რომელიც ზედა და ქვედა ციხის დამაკავშირებელ ქვის კიბესთან მარჯვენა მხარესაა, ზამთარშიც და ზაფხულშიც სველია. კედლის ზედა მხარე მიწითაა დაფარული და აქ მწვანე ნარგავები, ასევე პატარა აუზებიცაა. აუზები წყლით სეზონის გახსნის თანავე, მაისიდან ივსება.

შეკითხვაზე, მთავარი კედლის დანესტიანების მიზეზი სწორედ ამ აუზებიდან გაჟონილი წყალი ხომ არაა, ახალციხის ციხის დირექტორი დავით ტაბატაძე გვპასუხობს: „აუზები კარგად მუშაობს, ისინი უკვე შევამოწმეთ. დაზიანებული რომ იყოს, როცა წყლით ვავსებთ რაოდენობამ უნდა მოიკლოს, მაგრამ არ იკლებს, რაც იმას ნიშნავს, რომ მიზეზი ეს არ არის“.

ახალციხის ციხის ადმინისტრაციში აცხადებენ, რომ კედლის დანესტიანების მიზეზის შესასწავლად დაკვირვება მიმდინარეობას: „ ვეცადილობთ გაგვარკვიოთ, საიდან შეიძლება რომ სველდებოდეს კედელი,ამიტომ ვაკვირდებით“.

ილია სიდამონიძე, რომელიც ახალციხის ცეხეზე გახსნის დღიდან მუშაობს, ფიქრობს, რომ კედლის დანესტიანების მთავარი მიზეზი ზემოდან დაყრილი მიწაა: „მიწა წყალს იწოვს, მერე ეს წყალი იჟონება ქვევით და კედელი სველდება. თან მანდ გამწვანებას ვრწყავთ ხოლმე და ბუნებრივია ნესტია. წლებია ეს პრობლემაა მაგ ტერიტორიაზე და არ ვიცი ახლა რა უნდა გაკეთდეს. კომპლექსის რეაბილიტაციის დროს ეს კედელი ძველი სახით დარჩა, იგივე ქვებია და მაშინაც ნესტიანი იყო. ძველ ფოტოებზე ეს ყველაფერი კარგად ჩანს“.

„ახალციხის ციხის“ ადმინისტრაციაში ამბობენ, რომ მას შემდეგ რაც კედლის დასველების მიზეზს დაადგენენ, მას რეაბილიტაციას ჩაუტარებენ. თანხას კი იმ პროექტის ფარგლებში გაწერენ, რომლითაც ციხეზე ფასადების სარემონტო სამუშაოები სრულდება.

„ახალციხის ციხეზე“ ფასადების სარეაბილოიტაციო სამუშაოები გასულ წელს დაიწყო, ამისთვის ადგილობრივი ბიუჯეტიდან 76 952 ლარი გამოიყო, სამუშაოებს კომპანია „ნიუ პროჯექტი“ ახორციელებს. ციხის დირექტორის თქმით, ფასადებზე სამუშაოები, გაზაფხულზე ისევ გაგრძელდება.










[ლუბა გიორგაძე, ახალციხე]