'ხომ გაიმეტეს'

ჩვენ წმინდანების გვჯერა. ალბათ წმინდა ნინოს მივანდეთ ოთხი წლის ნინოს ბედი და ახლა გვწამს, რომ წმინდა ნინო იქ ზეცაში მფარველობს თანამოსახელეს.

გოგონა, რომელიც გარდაცვალების შემდეგ ქვეყანამ გაიცნო და რომლის დიდი, სევდიანთვალებიანი ფოტო ყოველ წამს გვხვდება სოციალურ ქსელში 22 იანვარს, საკუთარ სახლში გარდაცვლილი იპოვეს.

სიტყვა ზრუნვა მისთვის უცხო იყო. მისთვისაც და მისი მშობლებისთვისაც, სახელმწიფოსთვისაც.

მზრუნველობამოკლებული ბავშვი - გვაქვს ჩვენ ასეთი სიტყვათაწყობა. ანუ, ბავშვი, რომელიც ვერ იღებს განათლებას, ვერ იკვებება, არ აქვს უზრუნველყოფილი ჯანმრთელობისა და პირადი ჰიგიენისთვის საჭირო პირობები.

ამ სიტყვათაწყობას უკვე დაემატა ძალადობით გარდაცვლილი ბავშვი. ანუ, ამ შემთხვევაში ბავშვი რომელიც ცემით მოკლეს.
ჩემი რვა წლის ძმისშვილი დღეს მეკითხება: კოსმოსში პირველად ვინ გაფრინდა? - მეც ვუპასუხე, რომ თავიდან ძაღლები. რატომ ძაღლები? გაუკვირდა. კოსმოსურ ხომალდს ცდიდნენ და ჯერ ადამიანი არ გაუშვეს, ძაღლებზე გამოსცადეს. უფფ, ეგ რამ მოაფიქრებინათ, გაბრაზდა ბავშვი. მშვიდობით დაბრუნდნენ ძაღლები, ვცადე გამენეიტრალებინა ნათქვამი. რა მნიშვნელობა აქვს, ხომ გაიმეტეს, მითხრა მარიამმა და მეორე ოთახში გავიდა.

,,ხომ გაიმეტეს“, - ეს სიტყვა შუადღის შემდეგ თავში კოდალასავით მიკაკუნებს.

ოთხი წლის გოგონაც ხომ გავიმეტეთ სიკვდილისთვის.

[მატასი]