დიდთოვლობის გამო ახალქალაქის ორ სოფელში მანქანები ჩარჩა

სოფელი ხანდოს საავტომობილო გზაზე, დიდთოვლობის გამო, 15 იანვარს, დაახლოებით 00:00 საათისთვის ხუთმა მანქანამ გზის გაგრძელება ვეღარ შეძლო. ავტომანქანებში მყოფმა მგზავრებმა დასახმარებლად საგანგებო სიტუაციების სამსახურში დარეკეს. ადგილზე მაშველების ორი ბრიგადა მუშაობდა, რომლებმაც დახმარება მგზავრებს აღმოუჩინეს.

"ქორწილიდან მოდიოდა ხალხი და ჩარჩნენ თოვლში, ჩვენმა თანამშრომლებმა ისინი უსაფრთხო ადგილზე გადაიყვანეს", – ამბობენ საგანგებო სიტუაციების მართვის სამსახურში.

ამავე ღამეს, მსგავსი პრობლემა შეიქმნა ახალქალაქის სოფელ ქარცებში. დიდთოვლობისა და ქარის გამო რამდენიმე მანქანამ მოძრაობა ვერ გააგრძელა. თოვლის საფარის გამო, მანქანების გამოყვანა ამ დრომდე ვერ ხერხდება.

"დაახლოებით სამ მეტრამდე თოვლია და ჩვენი ტექნიკა იქამდე ვერ აღწევს, რათა მანქანები გამოვიყვანოთ. მთავარია, რომ ხალხი უსაფრთხოდაა",– ამბობს ახალქალაქის მუნიციპალიტეტის მერი იური უნანიანი.

[მარიამ ბარძიმაძე, ახალქალაქი]